សមត្ថកិច្ចខេត្តកំពង់ធំ បន្តយុទ្ធនាការទប់ស្កាត់បទល្មើសជលផលក្នុងភូមិសាស្ត្របឹងទន្លេសាប ដកហូតឧបករណ៍ល្មើសច្បាប់ជាច្រើនករណី

​
​(កំពង់ធំ)÷ កម្លាំងជំនាញនៃខណ្ឌរដ្ឋបាលជលផលខេត្តកំពង់ធំ សហការជាមួយអាជ្ញាធរដែនដី និងកម្លាំងប្រដាប់អាវុធចម្រុះ បានចុះប្រតិបត្តិការទប់ស្កាត់ និងបង្ក្រាបបទល្មើសជលផលយ៉ាងសកម្មនៅក្នុងភូមិសាស្ត្របឹងទន្លេសាប និងតាមបណ្តាស្រុកនានាក្នុងខេត្តកំពង់ធំ ក្នុងអំឡុងរដូវហាមឃាត់ (រដូវត្រីពងកូន)។
​ប្រតិបត្តិការតាមបណ្តាគោលដៅសំខាន់ៗ រួមមាន៖
​ស្រុកកំពង់ស្វាយ៖ លោក អ៊ុត វណ្ណរ៉ា អភិបាលស្រុកកំពង់ស្វាយ បានដឹកនាំមន្ត្រីខណ្ឌរដ្ឋបាលជលផល (លោក កែវ សុខា, លោក ឡែម ភីរម្យ និងមន្ត្រីជាប់កិច្ចសន្យា) ចុះពិនិត្យនៅចំណុចដៃបឹងប៉ោង ទួលដើមស្នាយ បឹងមហាពពាយ ត្រពាំព្រីង និងដៃបឹងផ្ដៅ ស្ថិតក្នុងឃុំត្រពាំងឬស្សី។ ក្រុមការងារបានរកឃើញរបាំងចំនួន ៥ រត់បិទផ្លូវទឹក ហើយបានធ្វើការអប់រំណែនាំឱ្យប្រជាពលរដ្ឋរុះរើរបាំងសាច់អួនដោយខ្លួនឯង កាលពីថ្ងៃទី១៩ ខែសីហា ឆ្នាំ២០២៦។
​ស្រុកស្ទោង (ឃុំពាមបាង)៖ លោក ហួន ផល នាយសង្កាត់រដ្ឋបាលជលផលពាមបាង ដឹកនាំមន្ត្រីជំនាញ សហការជាមួយលោកអនុសេនីយ៍ឯក លុយ សុភាព (តំបន់ប្រតិបត្តិការសឹករងកំពង់ធំ-យោធភូមិភាគទី៤) និងកម្លាំងទីបញ្ជាការស្រាល ចុះល្បាត និងបង្ក្រាបបទល្មើសនេសាទនៅចំណុចបាឡតទាល់ ឃុំពាមបាង។
​ស្រុកប្រាសាទបល្ល័ង្ក៖ លោក មឿន ចាន់ថា នាយសង្កាត់រដ្ឋបាលជលផលប្រាសាទបល្ល័ង្ក បានសហការជាមួយរដ្ឋបាលឃុំ ប៉ុស្តិ៍នគរបាលរដ្ឋបាលឃុំដូង និងប្រជាការពារ ចុះបង្ក្រាបបទល្មើសជលផលនៅចំណុចភូមិក្រួស និងត្នោតជ្រុះ ឃុំដូង។
​ស្រុកតាំងគោក៖ លោក កែវ សុឃឿន មន្ត្រីសង្កាត់រដ្ឋបាលជលផលបារាយណ៍ (ប្រចាំស្រុកតាំងគោក) រួមជាមួយកម្លាំងទីបញ្ជាការស្រាលកោះរះ បានចុះទប់ស្កាត់បទល្មើសនៅចំណុចអូរអ្នកវាំង វត្តចាស់ ស្វាយ តាចិន និងតំបន់ត្រពាំងនាងណ ស្ថិតក្នុងឃុំស្រឡៅ និងឃុំជ្រលង។
​ស្រុកសន្ទុក៖ លោក អ៊ន ហ៊ាន់ នាយសង្កាត់រដ្ឋបាលជលផលសន្ទុក បានចូលរួមជាមួយក្រុមការងារទីបញ្ជាការស្រាល (តំបន់៣) ចុះត្រួតពិនិត្យនៅតំបន់វាលក្រោម ឃុំព្នៅ (លទ្ធផលពុំមានសកម្មភាពអ្វីគួរឱ្យកត់សម្គាល់ឡើយ)។
​ការផ្សព្វផ្សាយច្បាប់នៅស្រុកស្ទោង៖ លោក គន ចាន់សីហា នាយសង្កាត់រដ្ឋបាលជលផលស្ទោង បានដឹកនាំកម្លាំង និងសហគមន៍នេសាទស្ពានគ្រង សរុប ២៥នាក់ ចុះទប់ស្កាត់បទល្មើស ព្រមទាំងផ្សព្វផ្សាយច្បាប់ជលផលថ្មីដល់ប្រជានេសាទ នៅខាងលិចអាងទឹកក្រពើស្គម ឃុំចំណារក្រោម។
​លទ្ធផលសរុបនៃបទល្មើសដែលត្រូវបានបង្ក្រាប៖
​ជាលទ្ធផល កម្លាំងជំនាញចម្រុះបានចុះរុះរើ និងកាប់បំផ្លាញចោលឧបករណ៍នេសាទខុសច្បាប់នៅនឹងកន្លែង រួមមាន៖
​របាំងសាច់អួនក្រឡាញឹក៖ ចំនួន ១៦ របាំង (ប្រវែងសរុប ១,៥៧០ ម៉ែត្រ)
​ឡុកសាច់អួន៖ ចំនួន ២៣ គ្រឿង
​លូ/លប៖ ចំនួន ១៧ មាត់
​បង្គោលឈើ៖ ចំនួន ៧៩៩ ដើម
​ បានចាក់លែងត្រីចម្រុះទម្ងន់ ២០ កីឡូក្រាម ចូលទៅក្នុងទន្លេវិញដោយសុវត្ថិភាព។
​