(កំពង់ធំ)៖ នាដងរសៀលថ្ងៃទី២៣ ខែមករា ឆ្នាំ២០២៦ លោក សាយ គឹមឡម អភិបាលស្រុកស្ទោង និងសហការី បានពាំនាំថវិកាឧបត្ថម្ភដ៏ថ្លៃថ្លារបស់ សម្ដេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា ព្រមទាំងអំណោយរបស់ ឯកឧត្តម ថោ ជេដ្ឋា ប្រធានក្រុមការងារចុះមូលដ្ឋានស្រុកស្ទោង ដើម្បីចុះសួរសុខទុក្ខ និងរំលែកទុក្ខដល់គ្រួសារសពអតីតយុទ្ធជន និងវីរកងទ័ពជួរមុខនៅតាមទីតាំងផ្សេងៗគ្នា។
ក្នុងឱកាសនោះ លោកអភិបាលស្រុក បានពាំនាំនូវការផ្ដាំផ្ញើសួរសុខទុក្ខ និងសេចក្ដីនឹករលឹកយ៉ាងជ្រាលជ្រៅពីសំណាក់ សម្ដេចតេជោ ហ៊ុន សែន និង ឯកឧត្តម ថោ ជេដ្ឋា ជូនចំពោះបងប្អូនប្រជាពលរដ្ឋ ជាពិសេសគ្រួសារអតីតយុទ្ធជន និងវីរកងទ័ពជួរមុខ។ លោកបានបញ្ជាក់ថា ថ្នាក់ដឹកនាំតែងតែគិតគូរ និងដឹងគុណជានិច្ចចំពោះវីរភាពកងទ័ព ដែលបានលះបង់សាច់ស្រស់ឈាមស្រស់ ដើម្បីបុព្វហេតុជាតិ សាសនា ព្រះមហាក្សត្រ ការពារបូរណភាពទឹកដី និងរក្សាសុខសន្តិភាពជូនមាតុភូមិ។
ទន្ទឹមនឹងនោះដែរ លោក សាយ គឹមឡម ក៏បានថ្លែងការកោតសរសើរយ៉ាងខ្ពង់ខ្ពស់ចំពោះក្រុមគ្រូពេទ្យនៃមន្ទីរពេទ្យបង្អែកស្ទោង ដែលបានខិតខំប្រឹងប្រែងយកចិត្តទុកដាក់ព្យាបាលជំងឺជូនប្រជាពលរដ្ឋ និងវីរកងទ័ពដែលកំពុងសម្រាកព្យាបាលបានយ៉ាងល្អប្រសើរ។
គ្រួសារសពអតីតយុទ្ធជន ២គ្រួសារ៖ គ្រួសារសពលោក អ៉ីម សុខម៉េង (ឃុំកំពង់ចិនត្បូង) និងគ្រួសារសពលោក ប៉ែន សំអ៊ត (ឃុំសំព្រោជ) ដោយក្នុងមួយគ្រួសារទទួលបានថវិកាឧបត្ថម្ភ ៤លានរៀល។
វីរកងទ័ពសម្រាកព្យាបាល៖ ចំនួន ១រូប នៅមន្ទីរពេទ្យបង្អែកស្ទោង ទទួលបានថវិកាលើកទឹកចិត្ត ២០ម៉ឺនរៀល។
នៅភូមិពពាយ ឃុំទ្រា៖ ពលរដ្ឋម្នាក់ទទួលបានថវិកា ២០ម៉ឺនរៀល ពីឯកឧត្តម ថោ ជេដ្ឋា និងថវិកា ២០ម៉ឺនរៀល បន្ថែមពីរដ្ឋបាលឃុំពពាយ ព្រមទាំងគ្រឿងឧបភោគបរិភោគ។
លោកអភិបាលស្រុកក៏បានចែកជូនសម្លៀកបំពាក់ គ្រឿងឧបភោគបរិភោគ និងថវិកាមួយចំនួនធំ ដល់លោកតា លោកយាយ និងកុមារៗនៅក្នុងឃុំផងដែរ។
សកម្មភាពនេះ បានបង្ហាញឱ្យឃើញពីការយកចិត្តទុកដាក់ខ្ពស់របស់រាជរដ្ឋាភិបាល និងក្រុមការងារចុះមូលដ្ឋាន ចំពោះសុខទុក្ខរបស់អតីតយុទ្ធជន និងប្រជាពលរដ្ឋនៅតាមទីជនបទ៕ដោយអ៊ួង សុផាត
