(កំពង់ធំ)៖ លោក សាយ គឹមឡម អភិបាលស្រុកស្ទោង បានសម្ដែងការដឹងគុណយ៉ាងជ្រាលជ្រៅជាអនេក ចំពោះវីរកងទ័ពជួរមុខ ដែលបានលះបង់សាច់ស្រស់ឈាមស្រស់ ដើម្បីការពារបូរណភាពទឹកដី។ ការថ្លែងបែបនេះ បានធ្វើឡើងក្នុងឱកាសដែលលោក និងសហការី បានរៀបចំពិធីប្រគល់គ្រឿងឧបភោគបរិភោគ ជូនដល់កងវីរៈសេនាធំការពារព្រំដែន ទិសព្រះវិហារ កាលពីព្រឹកថ្ងៃទី២១ ខែមករា ឆ្នាំ២០២៦ នៅសាលាស្រុកស្ទោង។
ក្នុងឱកាសនោះ លោកអភិបាលស្រុកបានបញ្ជាក់ថា ក្នុងនាមអាជ្ញាធរស្រុក និងតំណាងឱ្យសមរភូមិក្រោយ លោកនឹងបន្តខិតខំគាំទ្រ និងលើកទឹកចិត្តដល់បងប្អូនកងទ័ពដែលកំពុងឈរជើងការពារទឹកដីឱ្យបានជាប់ជាប្រចាំ។ លោកបានសង្កត់ធ្ងន់ថា៖
«យើងនឹងបន្តឧបត្ថម្ភគាំទ្រដល់វីរកងទ័ពដ៏អង់អាចក្លាហាន ដែលបានពលីសព្វបែបយ៉ាងដើម្បីបុព្វហេតុជាតិមាតុភូមិ ឱ្យបានដូចភ្លៀងរលឹម និងគ្រប់ពេលវេលា»។
ទន្ទឹមនឹងនេះ លោកអភិបាលស្រុកក៏បានគោរពកោតសរសើរ និងថ្លែងអំណរគុណយ៉ាងជ្រាលជ្រៅបំផុតចំពោះ Admin ជីងចក់ និងក្រុមការងារ ព្រមទាំងសប្បុរសជនទាំងអស់ ដែលបានកៀរគរមូលនិធិយ៉ាងសន្ធឹកសន្ធាប់ មកឧបត្ថម្ភដល់រដ្ឋបាលស្រុក ដើម្បីបន្តសកម្មភាពមនុស្សធម៌។ អំណោយទាំងនេះ នឹងត្រូវប្រើប្រាស់ដើម្បីជួយដល់៖
គ្រួសារវីរកងទ័ព និងកងទ័ពជួរមុខតាមខ្សែបន្ទាត់ព្រំដែន។
ប្រជាពលរដ្ឋងាយរងហានិភ័យ និងជនពិការ។
គ្រួសារជនភៀសសឹកក្នុងមូលដ្ឋាន។
ជាការឆ្លើយតប តំណាងវីរកងទ័ពជួរមុខ ក៏បានសម្ដែងនូវក្តីរំភើប និងដឹងគុណយ៉ាងជ្រាលជ្រៅចំពោះ លោកអភិបាលស្រុក និងក្រុមការងារ Admin ជីងចក់ ដែលតែងតែគិតគូរពីសុខទុក្ខរបស់ពួកគាត់។ សកម្មភាពនេះបានឆ្លុះបញ្ចាំងពីស្មារតី «ខ្មែរតែមួយ ខ្មែរជួយខ្មែរ» គ្រប់កាលៈទេសៈ។
សូមបញ្ជាក់ថា អំណោយដែលបានប្រគល់ជូននាឱកាសនោះ រួមមាន៖
លោក សាយ គឹមឡម៖ ថវិកាចំនួន ៣០ម៉ឺនរៀល។
ឧកញ៉ា លីម ប៊ុណ្ណា៖ ប្រេងសាំងចំនួន ៩១លីត្រ។
Admin ជីងចក់ និងក្រុមការងារ៖ គ្រឿងឧបភោគបរិភោគ និងសម្ភារៈប្រើប្រាស់យ៉ាងច្រើនសន្ធឹកសន្ធាប់ (សរុបចំនួន ២រថយន្ត)។ដផុ អ៊ួង សុផាត
