(ខេត្តកំពង់ធំ)៖ នៅរសៀលថ្ងៃទី១២ ខែមករា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាអនុប្រធានអចិន្ត្រៃយ៍សមាគមអតីតយុទ្ធជនកម្ពុជាខេត្ត បានដឹកនាំសហការី រួមជាមួយអាជ្ញាធរដែនដី ចុះប្រគល់ផ្ទះថ្មីមួយខ្នងជូនគ្រួសារអតីតយុទ្ធជនពលី ដែលមានជីវភាពខ្វះខាត និងខ្វះជម្រកស្នាក់នៅសមរម្យ ស្ថិតក្នុងភូមិអូរកន្ធរត្បូង សង្កាត់អូរកន្ធរ ក្រុងស្ទឹងសែន ខេត្តកំពង់ធំ។
ម្ចាស់ផ្ទះដែលទទួលបានអំណោយដ៏សប្បុរសនេះគឺ លោកស្រី ឱក ឡាត់ អាយុ ៧៨ឆ្នាំ។ លោកស្រីបានរៀបរាប់ទាំងក្តីរំភើបថា កូនប្រុសរបស់គាត់ឈ្មោះ ឡាន ដៀប គឺជាអតីតមន្ត្រីនគរបាល A3 ដែលបានពលីជីវិតក្នុងសមរភូមិស្រុកស្ទោង កាលពីឆ្នាំ១៩៩២។ បច្ចុប្បន្ន លោកស្រីត្រូវរ៉ាប់រងចិញ្ចឹមកូន និងចៅសរុបចំនួន ៥នាក់ ក្នុងបន្ទុក ដោយរស់នៅក្នុងខ្ទមចាស់ទ្រុឌទ្រោម និងតូចចង្អៀតជាខ្លាំង។
ឧត្តមសេនីយ៍ទោ សោម ស៊ុន បានបញ្ជាក់ពីលក្ខណៈបច្ចេកទេសនៃផ្ទះដែលទើបសាងសង់រួចនេះថា៖
ទំហំផ្ទះ៖ ៥ម៉ែត្រ គុណ ៧ម៉ែត្រ។
គ្រោងសាងសង់៖ សសរបេតុង ឆ្អឹងដែក ជញ្ជាំងស្មាតប៊ត និងរនាបក្រាលក្តារ។
ដំបូល៖ ប្រក់ស័ង្កសីកិនភ្លី។
មានតសំយ៉ាបផ្ទះបាយខាងក្រោយប្រវែង ៣ម៉ែត្រ និងមានបង្គន់អនាម័យត្រឹមត្រូវ។
លោកមេបញ្ជាការបានបន្ថែមថា គិតមកដល់ពេលនេះ ក្នុងក្រុងស្ទឹងសែនសម្រេចសាងសង់បានចំនួន ២៩ខ្នងរួចរាល់ហើយ និងកំពុងបន្តសាងសង់ជាច្រើនខ្នងទៀត ក្រោមការដឹកនាំរបស់សម្តេចតេជោ ហ៊ុន សែន ប្រធានសមាគមអតីតយុទ្ធជន និងសម្តេចមហាបវរធិបតី ហ៊ុន ម៉ាណែត តាមរយៈឯកឧត្តមទេសរដ្ឋមន្ត្រី គន់ គីម។
ក្រៅពីការប្រគល់ផ្ទះ ក្រុមការងារក៏បាននាំយកនូវអំណោយបន្ថែមរបស់ សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី រួមមាន៖
គ្រឿងឧបភោគបរិភោគ និងស្បៀងអាហារ។
សម្ភារប្រើប្រាស់ក្នុងផ្ទះ (មុង ភួយ កន្ទេល ខ្នើយ ចាន ឆ្នាំង)។
ថវិកាមួយចំនួនសម្រាប់ដោះស្រាយជីវភាព។
មានមតិថ្លែងអំណរគុណ នាឱកាសនោះ លោកស្រី ឱក ឡាត់ បានគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងសម្តេចធិបតី និងលោកជំទាវបណ្ឌិត ដែលជានិច្ចកាលតែងតែយកចិត្តទុកដាក់ចំពោះសុខទុក្ខរបស់អតីតយុទ្ធជន និងគ្រួសារជនពលី ដែលបានលះបង់ដើម្បីបុព្វហេតុជាតិមាតុភូមិ៕ដោយ អ៊ួង សុផាត
