លោកជំទាវ ឃួន ឃុនឌី អំពាវនាវឱ្យប្រជាពលរដ្ឋជឿជាក់លើរាជរដ្ឋាភិបាល ក្នុងការការពារបូរណភាពទឹកដី ក្នុងឱកាសចុះសំណេះសំណាលនៅស្រុកកំពង់ស្វាយ

(កំពង់ធំ)៖ លោកជំទាវ ឃួន ឃុនឌី សមាជិកព្រឹទ្ធសភា និងជាប្រធានក្រុមការងារចុះមូលដ្ឋានស្រុកកំពង់ស្វាយ បានអំពាវនាវដល់បងប្អូនប្រជាពលរដ្ឋ សូមបន្តជឿជាក់លើការដឹកនាំរបស់រាជរដ្ឋាភិបាល ចំពោះកិច្ចខិតខំប្រឹងប្រែងការពារបូរណភាពទឹកដី និងរក្សាសន្តិភាព។
ការថ្លែងបែបនេះ ធ្វើឡើងក្នុងឱកាសដែលលោកជំទាវ អញ្ជើញចុះជួបសំណេះសំណាលសួរសុខទុក្ខ គណៈកម្មាធិការបក្សឃុំ និងសមាជិកអចិន្ត្រៃយ៍គណបក្សឃុំសាន់គ ស្រុកកំពង់ស្វាយ ខេត្តកំពង់ធំ នាព្រឹកថ្ងៃទី០៧ ខែមករា ឆ្នាំ២០២៦។ ពិធីនេះក៏មានការចូលរួមពី លោកជំទាវ យស ថានារី សមាជិករដ្ឋសភា និងជាអនុប្រធានក្រុមការងារចុះមូលដ្ឋានស្រុក ព្រមទាំងថ្នាក់ដឹកនាំមូលដ្ឋាន សរុបចំនួន ៥៦នាក់។
ស្មារតីជ័យជំនះ ៧ មករា ជាមូលដ្ឋានគ្រឹះនៃសន្តិភាព
ក្នុងជំនួបនោះ លោកជំទាវបានរំលឹកពីវីរភាព និងការលះបង់ដ៏ខ្ពង់ខ្ពស់របស់យុទ្ធជនជំនាន់មុន ក្នុងការរំដោះប្រទេសជាតិចេញពីរបបប្រល័យពូជសាសន៍។ លោកជំទាវបានសង្កត់ធ្ងន់ថា៖
ថ្ងៃទី៧ ខែមករា គឺជាថ្ងៃជ័យជំនះប្រវត្តិសាស្ត្រ ដែលបានសង្គ្រោះជីវិតប្រជាជនកម្ពុជាពីរបបខ្មែរក្រហម។
ជ័យជំនះនេះបាននាំមកនូវសិទ្ធិសេរីភាព និងការអភិវឌ្ឍលើគ្រប់វិស័យ រហូតធ្វើឱ្យកម្ពុជាមានកិត្យានុភាពលើឆាកអន្តរជាតិ។
ការការពារបូរណភាពទឹកដី និងការជឿជាក់លើរាជរដ្ឋាភិបាល
ពាក់ព័ន្ធនឹងសភាពការណ៍ព្រំដែន លោកជំទាវបានជម្រាបជូនអំពីកិច្ចខិតខំប្រឹងប្រែងរបស់រាជរដ្ឋាភិបាល លើសមរភូមិការទូត ផ្លូវច្បាប់ និងយោធា ដើម្បីការពារបូរណភាពទឹកដី។
លោកជំទាវបានបញ្ជាក់យ៉ាងច្បាស់ថា៖
”សូមបងប្អូនប្រជាពលរដ្ឋជឿជាក់លើការដឹកនាំរបស់ សម្តេចតេជោ ហ៊ុន សែន ប្រធានព្រឹទ្ធសភា និង សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ រាជរដ្ឋាភិបាលប្ដេជ្ញាការពារបូរណភាពទឹកដីឱ្យបានគង់វង្ស និងមិនមានការចរចាប្តូរយកសន្តិភាព ដោយការកាត់ទឹកដីឱ្យទៅប្រទេសណាមួយឡើយ។”
ជាទីបញ្ចប់ លោកជំទាវក៏បានកោតសរសើរដល់វីរយុទ្ធជនដែលកំពុងឈរជើងការពារព្រំដែនយ៉ាងអង់អាចក្លាហាន និងបានជំរុញឱ្យមន្ត្រីបក្សមូលដ្ឋានទាំងអស់ បន្តយកចិត្តទុកដាក់បម្រើសេវាសាធារណៈ និងដោះស្រាយបញ្ហាប្រឈមរបស់ប្រជាពលរដ្ឋឱ្យបានទាន់ពេលវេលា៕ដោយ អ៊ួង សុផាត