ដោយ អ៊ួង សុផាត÷](ខេត្តកំពង់ធំ)៖ នៅល្ងាចថ្ងៃទី០៦ ខែមករា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជនកម្ពុជាខេត្ត បានដឹកនាំសហការី និងបងប្អូនអតីតយុទ្ធជន ចូលរួមគោរពវិញ្ញាណក្ខន្ធសពលោកពលបាលឯក ឈួន ឈាត អាយុ ៦៦ ឆ្នាំ ដែលបានទទួលមរណភាពដោយរោគាពាធ កាលពីពេលថ្មីៗនេះ នៅឃុំក្រយា ស្រុកសន្ទុក ខេត្តកំពង់ធំ។
ក្នុងពិធីដ៏សង្រេងសង្រ្គៃនេះ តំណាងលេខាធិការដ្ឋានសមាគមអតីតយុទ្ធជន បានអានសារលិខិតរំលែកទុក្ខ និងរំលឹកពីប្រវត្តិរូបសង្ខេបរបស់សព៖
ឆ្នាំ១៩៩០៖ ចូលបម្រើកងទ័ពក្នុងអង្គភាពយោធាស្រុកស្ទោង។
ឆ្នាំ១៩៩២៖ បានរងរបួសក្នុងសមរភូមិនីពេជ ក្លាយជាយុទ្ធជនពិការ។
ជីវភាព៖ កន្លងមកលោកគ្មានដី គ្មានផ្ទះពិតប្រាកដ រហូតទទួលបានការយកចិត្តទុកដាក់ពី សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត តាមរយៈការផ្តល់ដីសម្បទានសង្គមកិច្ចចំនួន ១,៥ ហិកតា និងផ្ទះមួយខ្នង ដើម្បីកសាងជីវភាពថ្មីនៅឃុំក្រយា។
ឧត្តមសេនីយ៍ទោ សោម ស៊ុន បានសម្តែងនូវការសោកស្តាយយ៉ាងខ្លាំង ចំពោះការបាត់បង់យុទ្ធមិត្តដែលធ្លាប់មានគុណបំណាច់ចំពោះជាតិមាតុភូមិ និងជាស្វាមី ឪពុកដ៏ល្អក្នុងគ្រួសារ។ លោកបានបញ្ជាក់ថា បច្ចុប្បន្នមានគ្រួសារអតីតយុទ្ធជនចំនួន ២០៦ គ្រួសារ កំពុងរស់នៅលើដីសម្បទានសង្គមកិច្ចនេះ ហើយក្នុងរយៈពេល ៥ ឆ្នាំចុងក្រោយ មានបងប្អូនយុទ្ធជនចំនួន ១៩ នាក់ហើយ បានទទួលមរណភាពដោយសារជំងឺ និងរបួសចាស់រើឡើង។
ដើម្បីជួយសម្រាលបន្ទុកគ្រួសារសព ឧត្តមសេនីយ៍ទោ សោម ស៊ុន បាននាំយក៖
ថវិកាបេឡាមរណសង្គ្រោះ៖ ចំនួន ៤,០០០,០០០ រៀល របស់សមាគមអតីតយុទ្ធជនកម្ពុជា។
អំណោយមនុស្សធម៌៖ របស់ សម្តេចមហាបវរធិបតី ហ៊ុន ម៉ាណែត និង លោកជំទាវ ដើម្បីចូលរួមក្នុងពិធីបុណ្យសពតាមប្រពៃណី។
ជាកិច្ចបញ្ចប់ ឯកឧត្តមមេបញ្ជាការ បានបួងសួងដល់វិញ្ញាណក្ខន្ធសពលោកពលបាលឯក ឈួន ឈាត សូមបានទៅកាន់សុគតិភពកុំបីឃ្លៀងឃ្លាតឡើយ៕ដោយ អ៊ួង សុផាត
