​អនុប្រធានទី២ ព្រឹទ្ធសភា ជំរុញឱ្យក្រុមប្រឹក្សាឃុំពង្រឹងសាមគ្គីភាពផ្ទៃក្នុង ដើម្បីបម្រើពលរដ្ឋឱ្យកាន់តែប្រសើរ

​(កំពង់ធំ)៖ ឯកឧត្តមបណ្ឌិត ធន់ វឌ្ឍនា អនុប្រធានទី២ នៃព្រឹទ្ធសភា បានសង្កត់ធ្ងន់ និងជំរុញឱ្យសមាជិកក្រុមប្រឹក្សាឃុំទាំងអស់ ត្រូវប្រកាន់ខ្ជាប់នូវស្មារតីសាមគ្គីភាព និងឯកភាពផ្ទៃក្នុងឱ្យបានរឹងមាំ ដើម្បីធានាបាននូវប្រសិទ្ធភាពការងារ និងការអភិវឌ្ឍមូលដ្ឋាន។
​ការថ្លែងបែបនេះ ធ្វើឡើងក្នុងឱកាសដែលឯកឧត្តមបណ្ឌិត អញ្ជើញជាអធិបតីក្នុងកម្មវិធី «ស្វែងយល់បញ្ហាប្រឈម និងឱកាសនៅឃុំសំបូរ» ស្រុកប្រាសាទសំបូរ ខេត្តកំពង់ធំ កាលពីថ្ងៃទី០៨ ខែឧសភា ឆ្នាំ២០២៦។ ពិធីនេះក៏មានការអមដំណើរដោយ លោកជំទាវ ឃួន ឃុនឌី សមាជិកព្រឹទ្ធសភា រួមជាមួយតំណាងស្ថានទូតនានាប្រចាំកម្ពុជាផងដែរ។
​ខ្លឹមសារសំខាន់ៗនៃប្រសាសន៍ឯកឧត្តមបណ្ឌិត ធន់ វឌ្ឍនា៖
​ការដោះស្រាយបញ្ហាប្រឈម៖ ឯកឧត្តមបានលើកទឹកចិត្តឱ្យក្រុមប្រឹក្សាឃុំ ហ៊ានលើកឡើងនូវរាល់កង្វល់ និងបញ្ហាប្រឈមជាក់ស្តែងនៅក្នុងមូលដ្ឋាន ដើម្បីស្វែងរកដំណោះស្រាយឱ្យបានទាន់ពេលវេលា ស្របតាមតម្រូវការចាំបាច់របស់ប្រជាពលរដ្ឋ។
​សាមគ្គីភាពជាកម្លាំង៖ ឯកឧត្តមបានបញ្ជាក់ថា ដើម្បីឱ្យការងារអភិវឌ្ឍន៍មូលដ្ឋានប្រព្រឹត្តទៅដោយរលូន និងទទួលបានការគាំទ្រពីមហាជន លុះត្រាតែមានការឯកភាពគ្នាជាធ្លុងមួយ។
​ការគាំទ្ររាជរដ្ឋាភិបាល៖ ការពង្រឹងសាមគ្គីភាព និងឯកភាពជាតិ គឺជាការបង្ហាញនូវការគោរព និងគាំទ្រយ៉ាងពេញទំហឹងចំពោះការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។
​ការពារអធិបតេយ្យភាព៖ ក្នុងបរិបទដែលកម្ពុជាត្រូវការសន្តិភាព និងការគោរពច្បាប់អន្តរជាតិ ឯកឧត្តមបានលើកឡើងពីសារៈសំខាន់នៃការបង្ហាញភាពរឹងមាំទៅកាន់ពិភពលោក និងប្រទេសជិតខាង ក្នុងការការពារបូរណភាពទឹកដី។
​”ទោះបីយើងជួបប្រទះបញ្ហាច្រើន ក៏ការអភិវឌ្ឍមូលដ្ឋានត្រូវតែបន្ត ព្រោះវាជាតម្រូវការចាំបាច់របស់ប្រជាជនដែលគ្មានទីបញ្ចប់”។ នេះជាការបញ្ជាក់បន្ថែមរបស់ឯកឧត្តមបណ្ឌិត។
​ក្រោយបញ្ចប់កិច្ចពិភាក្សា ឯកឧត្តមបណ្ឌិត និងក្រុមការងារ រួមជាមួយតំណាងស្ថានទូតនានា បានអញ្ជើញទៅធ្វើទស្សនកិច្ចនៅ ប្រាសាទសំបូរព្រៃគុក ដើម្បីស្វែងយល់បន្ថែមពីតម្លៃវប្បធម៌ខ្មែរ និងសម្បត្តិបេតិកភណ្ឌពិភពលោកដ៏អស្ចារ្យដែលជាមោទនភាពរបស់ជាតិ៕ដោយ អ៊ួង សុផាត