ទូកនេសាទអូសខ្ចៅខុសច្បាប់ ៩គ្រឿង ត្រូវកម្លាំងយោធាបង្ក្រាប និងដកហូតខ្ចៅជាង ១តោនកន្លះ លែងចូលទន្លេវិញ

​
​ខេត្តកំពង់ឆ្នាំង៖ កម្លាំងបង្ក្រាបបទល្មើសនេសាទ នៃតំបន់ប្រតិបត្តិការសឹករងខេត្តកំពង់ឆ្នាំង ទិសទី២ ស្រុកបរិបូណ៌ សហការជាមួយកម្លាំងយោធភូមិភាគទី៥ បានចុះបង្ក្រាប និងឃាត់ទូកនេសាទអូសខ្ចៅខុសច្បាប់ចំនួន ០៩គ្រឿង ក្នុងរដូវបិទនេសាទ។
​ប្រតិបត្តិការនេះបានធ្វើឡើងកាលពីថ្ងៃទី១៣ ខែមិថុនា ឆ្នាំ២០២៦ ដោយកម្លាំងចម្រុះបានធ្វើការល្បាត និងរុករកបទល្មើសនៅចំណុចព្រែកតាពេជ្រ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង។
​ជាលទ្ធផល ក្នុងកិច្ចប្រតិបត្តិការនោះ កម្លាំងជំនាញបានធ្វើការឃាត់ខ្លួនអ្នកនេសាទចំនួន ១៥នាក់ និងដកហូតទូកចំនួន ០៩គ្រឿង ដែលបានធ្វើសកម្មភាពអូសខ្ចៅដោយប្រើម៉ាស៊ីនយ៉ាងអាណាធិបតេយ្យក្នុងរដូវបិទនេសាទ។ បច្ចុប្បន្ន វត្ថុតាងទូកទាំង ០៩គ្រឿង រួមនឹងឧបករណ៍ល្មើសច្បាប់មួយចំនួន ត្រូវបានយកទៅរក្សាទុកជាបណ្តោះអាសន្ននៅស្នាក់ការកងពលតូចថ្មើរជើងលេខ៥១ ដើម្បីចាត់ការតាមនីតិវិធី។
​ដោយឡែក ផលនេសាទខ្ចៅដែលដកហូតបានពីទូកល្មើសច្បាប់ទាំងនោះ មានទម្ងន់សរុបប្រមាណ ១,៥០០ គីឡូក្រាម (១តោនកន្លះ) ត្រូវបានកម្លាំងសមត្ថកិច្ចធ្វើការលែងទៅក្នុងទន្លេធម្មជាតិវិញភ្លាមៗផងដែរ។
​ទន្ទឹមនឹងនោះ កម្លាំងយោធាបានធ្វើការអប់រំណែនាំ និងធ្វើកិច្ចសន្យាចំពោះប្រជានេសាទទាំង ១៥នាក់ ដោយបានពន្យល់ថា ក្នុងអំឡុងពេលរដូវបិទនេសាទនេះ ការប្រើប្រាស់ឧបករណ៍អូសខ្ចៅខុសច្បាប់ គឺបង្កផលប៉ះពាល់យ៉ាងធ្ងន់ធ្ងរដល់ប្រព័ន្ធអេកូឡូស៊ី ជីវៈចម្រុះ និងជម្រកត្រីពងកូន។
​កងកម្លាំងប្រតិបត្តិការសឹករងស្រុកបរិបូណ៌ បានគូសបញ្ជាក់ថា កន្លងមកសមត្ថកិច្ចតែងតែចុះអប់រំណែនាំជាច្រើនលើកច្រើនសាររួចមកហើយ ប៉ុន្តែនៅតែមានជនខិលខូចលួចលាក់ធ្វើសកម្មភាព និងមិនស្តាប់តាមការណែនាំ។ ក្នុងនាមសមត្ថកិច្ច សូមអំពាវនាវយ៉ាងទទូចដល់បងប្អូនប្រជានេសាទទាំងអស់ មេត្តាចូលរួមគោរពច្បាប់ និងសហការគ្នាប្រឆាំងបទល្មើសនេសាទ ដើម្បីថែរក្សាធនធានធម្មជាតិឱ្យបានគង់វង្ស៕
​