អភិបាលស្រុកស្ទោង ណែនាំឱ្យអាជ្ញាធរឃុំយកចិត្តទុកដាក់ខ្ពស់លើសុខុមាលភាពជនពិការ និងជនងាយរងគ្រោះ

(កំពង់ធំ)៖ លោក សាយ គឹមឡម អភិបាលស្រុកស្ទោង បានដាក់បទបញ្ជា និងណែនាំដល់អាជ្ញាធរឃុំទាំងអស់ ត្រូវបង្កើនការយកចិត្តទុកដាក់ឱ្យបានដិតដល់ចំពោះសុខទុក្ខ និងសុខុមាលភាពរបស់ប្រជាពលរដ្ឋ ជាពិសេសជនមានពិការភាព និងក្រុមគ្រួសារដែលងាយរងហានិភ័យនៅក្នុងមូលដ្ឋាន។
ការណែនាំនេះបានធ្វើឡើងក្នុងឱកាសដែលលោកអភិបាលស្រុក អញ្ជើញជួបសំណេះសំណាលសួរសុខទុក្ខ និងនាំយកអំណោយដ៏ថ្លៃថ្លារបស់ ឯកឧត្តម ថោ ជេដ្ឋា ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្ទោង ចែកជូនដល់ពលរដ្ឋមានពិការភាព និងងាយរងហានិភ័យ ក្នុងឃុំម្សាក្រង កាលពីរសៀលថ្ងៃទី២៦ ខែមករា ឆ្នាំ២០២៦។
ក្នុងឱកាសនោះ លោកអភិបាលស្រុក ក៏បានគោរពថ្លែងអំណរគុណយ៉ាងជ្រាលជ្រៅបំផុតចំពោះ ឯកឧត្តម ថោ ជេដ្ឋា និងសហការី ដែលជានិច្ចកាលតែងតែឧបត្ថម្ភគាំទ្រនូវគ្រឿងឧបភោគបរិភោគ និងសម្ភារៈប្រើប្រាស់យ៉ាងច្រើនសន្ធឹកសន្ធាប់ដល់រដ្ឋបាលស្រុក ដើម្បីបន្តចែកជូនដល់បងប្អូនប្រជាពលរដ្ឋ ដូចជា៖
គ្រួសារវីរកងទ័ព និងជនភៀសសឹក។
ជនមានពិការភាព។
ប្រជាពលរដ្ឋដែលជួបការលំបាក និងងាយរងគ្រោះបំផុត។

ក្រៅពីការចែកអំណោយ លោក សាយ គឹមឡម ក៏បានអំពាវនាវដល់បងប្អូនប្រជាពលរដ្ឋទាំងអស់ នូវចំណុចសំខាន់ៗមួយចំនួន៖
១. ការរស់នៅស្អាត៖ ត្រូវអនុវត្តតាមគោលការណ៍អនាម័យ «៣ល្អ» និងថែរក្សាសុខភាពឱ្យបានខ្ជាប់ខ្ជួន។
២. សុខភាពរាងកាយ៖ ត្រូវធ្វើលំហាត់ប្រាណឱ្យបានទៀងទាត់ជាប្រចាំ។
៣. ការការពារធនធានធម្មជាតិ៖ ត្រូវចូលរួមអភិរក្សធនធានមច្ឆជាតិ និងចៀសវាងការនេសាទខុសច្បាប់គ្រប់រូបភាព ដើម្បីចៀសផុតពីទោសទណ្ឌតាមផ្លូវច្បាប់ និងធានានូវនិរន្តរភាពអាហារសម្រាប់កូនចៅជំនាន់ក្រោយ។
សូមបញ្ជាក់ថា ប្រជាពលរដ្ឋដែលទទួលបានអំណោយក្នុងឱកាសនេះមានចំនួន ២០គ្រួសារ ដោយក្នុងមួយគ្រួសារទទួលបាន៖
អង្ករ ១បេ ព្រមទាំងគ្រឿងឧបភោគបរិភោគជាច្រើនមុខ។
សម្លៀកបំពាក់ និងសម្ភារៈប្រើប្រាស់មួយចំនួន។
ដោយឡែក កុមារៗនៅក្នុងឃុំ ក៏ទទួលបាននូវការចែកជូនសម្លៀកបំពាក់ និងនំចំណីផងដែរ។ដោយអ៊ួង សុផាត