ឧត្តមសេនីយ៍ទោ សោម ស៊ុន ប្រគល់ផ្ទះទី៦៩ អំណោយសម្តេចតេជោ ជូនអតីតយុទ្ធជនសោធននិវត្តន៍ នៅស្រុកកំពង់ស្វាយ

​(ខេត្តកំពង់ធំ)៖ នៅរសៀលថ្ងៃទី២៦ ខែមករា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជនកម្ពុជាខេត្ត បានអញ្ជើញប្រគល់ផ្ទះថ្មីមួយខ្នង (ខ្នងទី៦៩) ដែលជាអំណោយដ៏ថ្លៃថ្លារបស់ សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់គ្រួសារអតីតយុទ្ធជនសោធននិវត្តន៍ដែលមានជីវភាពខ្វះខាត ស្ថិតក្នុងភូមិប្រាសាទ ឃុំត្រពាំងឬស្សី ស្រុកកំពង់ស្វាយ។
​ពិធីនេះក៏មានការអញ្ជើញចូលរួមពី លោក ជួន សិលាវិត ប្រធានសាខាមូលនិធិជាតិជំនួយសង្គមខេត្ត, លោក អ៊ុត វណ្ណរ៉ា អភិបាលស្រុកកំពង់ស្វាយ ព្រមទាំងអាជ្ញាធរដែនដី និងសហការីជាច្រើនរូបទៀត។
​យោងតាមរបាយការណ៍របស់ លោកអនុសេនីយ៍ទោ នួន ស៊ីថាល់ លេខាធិការដ្ឋានសមាគមអតីតយុទ្ធជនខេត្ត បានឱ្យដឹងថា៖
​ម្ចាស់ផ្ទះ៖ លោក ស៊ុក សាញ់ អាយុ ៦៦ឆ្នាំ (អតីតព្រិន្ទបាលទោ នគរបាលស្រុកកំពង់ស្វាយ ចូលនិវត្តន៍ឆ្នាំ២០១៦)។
​ស្ថានភាពគ្រួសារ៖ មានសមាជិកក្នុងបន្ទុកសរុប ៨នាក់ (ភរិយា កូន និងចៅ)។
​ស្ថានភាពរស់នៅមុនទទួលបានផ្ទះ៖ ស្នាក់នៅក្នុងផ្ទះតូចចង្អៀត ទ្រុឌទ្រោម និងមិនមានដីធ្លីសមរម្យសម្រាប់សាងសង់ជម្រក។
​ឧត្តមសេនីយ៍ទោ សោម ស៊ុន បានបញ្ជាក់ថា ផ្ទះដែលប្រគល់ជូននាពេលនេះមានលក្ខណៈស្តង់ដាររឹងមាំ រួមមាន៖
​ទំហំ៖ ៥ម៉ែត្រ x ៧ម៉ែត្រ (មានតសំយ៉ាបផ្ទះបាយ ៣ម៉ែត្របន្ថែម)។
​រចនាសម្ព័ន្ធ៖ សសរបេតុង ឆ្អឹងដែក ដំបូលប្រក់ស័ង្កសីកិនភ្លី ជញ្ជាំងស្មាតប៊ត និងក្រាលក្តារ។
​គ្រឿងបំពាក់៖ មានបង្គន់អនាម័យត្រឹមត្រូវតាមលក្ខណៈរស់នៅស្អាត។
​ក្នុងឱកាសនោះ ឧត្តមសេនីយ៍ទោ សោម ស៊ុន ក៏បាននាំយកអំណោយបន្ថែមរបស់ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត រួមមាន៖ ស្បៀងអាហារ គ្រឿងឧបភោគបរិភោគ និងសម្ភារប្រើប្រាស់ក្នុងផ្ទះ (មុង ភួយ កន្ទេល ខ្នើយ ចាន ឆ្នាំង) ដើម្បីជួយសម្រួលដល់ការរស់នៅប្រចាំថ្ងៃ។
​“គិតមកដល់ពេលនេះ នៅក្នុងស្រុកកំពង់ស្វាយ យើងបានសាងសង់ផ្ទះជូនអតីតយុទ្ធជនបានចំនួន ៦៩ខ្នងរួចមកហើយ និងកំពុងបន្តសាងសង់ជាហូរហែ ដែលនេះជាការយកចិត្តទុកដាក់បំផុតពីសំណាក់សម្តេចតេជោ និងសម្តេចធិបតី តាមរយៈឯកឧត្តមទេសរដ្ឋមន្ត្រី គន់ គីម”។ នេះជាការបញ្ជាក់បន្ថែមរបស់លោកមេបញ្ជាការ។
​ជាទីបញ្ចប់ លោក អ៊ុត វណ្ណរ៉ា អភិបាលស្រុកកំពង់ស្វាយ តំណាងឱ្យគ្រួសារអតីតយុទ្ធជន បានសម្តែងនូវកតញ្ញូតាធម៌ និងអំណរគុណយ៉ាងជ្រាលជ្រៅបំផុតចំពោះ សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ដែលជានិច្ចកាលតែងតែគិតគូរពីសុខទុក្ខ និងជីវភាពរបស់អតីតយុទ្ធជនដែលបានលះបង់ដើម្បីជាតិមាតុភូមិ៕ដោយ អ៊ួង សុផាត