លោកជំទាវ ឃួន ឃុនឌី ជំរុញឱ្យពង្រឹងសមត្ថភាពសមាជិកបក្សនៅស្រុកកំពង់ស្វាយ ដើម្បីត្រៀមលក្ខណៈសម្រាប់ការបោះឆ្នោតខាងមុខ

​
​(កំពង់ធំ)៖ លោកជំទាវ ឃួន ឃុនឌី ប្រធានក្រុមការងារគណបក្សចុះមូលដ្ឋានស្រុកកំពង់ស្វាយ ខេត្តកំពង់ធំ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែមករា ឆ្នាំ២០២៦ និងដាក់ចេញទិសដៅការងារបន្ត។ ក្នុងឱកាសនោះ លោកជំទាវបានសង្កត់ធ្ងន់ និងជំរុញឱ្យប្រធានគណបក្សគ្រប់ឃុំ ត្រូវពង្រឹងសមត្ថភាពសមាជិកឱ្យកាន់តែរឹងមាំ ដើម្បីត្រៀមលក្ខណៈឱ្យបានគ្រប់ជ្រុងជ្រោយសម្រាប់ការបោះឆ្នោតនាពេលខាងមុខ។
​ក្នុងកិច្ចប្រជុំដែលបានប្រព្រឹត្តទៅនាថ្ងៃទី១៨ ខែមករា ឆ្នាំ២០២៦ នៅស្នាក់ការគណបក្សស្រុកកំពង់ស្វាយ លោកជំទាវបានកោតសរសើរចំពោះកិច្ចខិតខំប្រឹងប្រែងរបស់ក្រុមការងារទាំងអស់ ដែលបានលះបង់កម្លាំងកាយចិត្តក្នុងការបម្រើប្រជាពលរដ្ឋ និងបានជំរុញឱ្យបន្តរៀបចំផែនការអនុវត្តន៍ដោយស្មារតីទទួលខុសត្រូវខ្ពស់ និងរក្សាសាមគ្គីភាពផ្ទៃក្នុងឱ្យបានល្អប្រសើរ។
​ចំណុចសំខាន់ៗដែលលោកជំទាវបានផ្ដាំផ្ញើរួមមាន៖
​ការពង្រឹងសមត្ថភាពសមាជិក៖ ត្រូវក្តាប់ឱ្យបាននូវស្ថានភាពជាក់ស្តែងក្នុងមូលដ្ឋាន និងចូលរួមដោះស្រាយបញ្ហាប្រឈមជូនប្រជាពលរដ្ឋឱ្យបានទាន់ពេលវេលា ដើម្បីបង្កើនទំនុកចិត្ត និងរក្សាសុខសន្តិភាព។
​ការឆ្លើយតបព័ត៌មានក្លែងក្លាយ៖ ទោះបីគណបក្សមានការគាំទ្រច្រើនលើសលប់ ក៏មិនត្រូវមានការធ្វេសប្រហែសឡើយ។ ត្រូវត្រៀមខ្លួនទប់ទល់នឹងការវាយប្រហារតាមបណ្តាញសង្គមពីសំណាក់ក្រុមប្រឆាំង ដែលព្យាយាមបង្កាច់បង្ខូច និងបំបែកបំបាក់សាមគ្គីភាពជាតិ។
​ការចុះមូលដ្ឋាន៖ សមាជិកបក្សទាំងអស់ត្រូវចុះជួបប្រជាពលរដ្ឋឱ្យបានញឹកញាប់ ដើម្បីស្វែងយល់ពីសុខទុក្ខ និងកៀរគរការគាំទ្រមកលើគណបក្សប្រជាជនកម្ពុជាឱ្យកាន់តែខ្លាំងក្លា ចេញពីបេះដូងពិតប្រាកដ។
​ជាទីបញ្ចប់ លោកជំទាវ ឃួន ឃុនឌី បានរំលឹកថា សមាជិកបក្សម្នាក់គឺជាសន្លឹកឆ្នោតមួយសន្លឹកដ៏មានតម្លៃ ដូច្នេះរាល់សកម្មភាពបម្រើពលរដ្ឋ គឺជាកត្តាកំណត់ក្នុងការធានានូវជ័យជម្នះ ដើម្បីបន្តអភិវឌ្ឍន៍ប្រទេសជាតិឱ្យកាន់តែរីកចម្រើនថែមទៀត៕ដោយ អ៊ួង សុផាត