លោកឧត្តមសេនីយ៍ទោ ហេង សុផល ចាត់តំណាងចុះសាកសួរសុខទុក្ខ និងនាំយកអំណោយជូនជនភៀសសឹក និងពលរដ្ឋខ្វះខាត ៥០គ្រួសារ នៅស្រុកស្ទោង

(កំពង់ធំ)៖ នាព្រឹកថ្ងៃទី៧ ខែមករា ឆ្នាំ២០២៦ លោកវរសេនីយ៍ឯក ម៉ង់ វិទូ ស្នងការរងនគរបាលខេត្តកំពង់ធំ តំណាងដ៏ខ្ពង់ខ្ពស់ លោកឧត្តមសេនីយ៍ទោ ហេង សុផល ស្នងការនគរបាលខេត្ត បានដឹកនាំកងកម្លាំងចុះសាកសួរសុខទុក្ខ ព្រមទាំងនាំយកស្បៀងអាហារ និងគ្រឿងឧបភោគបរិភោគ ឧបត្ថម្ភជូនបងប្អូនជនភៀសសឹក និងប្រជាពលរដ្ឋដែលមានជីវភាពខ្វះខាតចំនួន ៥០គ្រួសារ ស្ថិតនៅវត្តខ្មាក់ ឃុំចំណារលើ ស្រុកស្ទោង ខេត្តកំពង់ធំ។
ក្នុងឱកាសនោះ លោកវរសេនីយ៍ឯក ម៉ង់ វិទូ បានពាំនាំនូវប្រសាសន៍ផ្ដាំផ្ញើសាកសួរសុខទុក្ខដោយក្ដីនឹករលឹកពីសំណាក់ លោកស្នងការខេត្ត ជូនចំពោះបងប្អូនប្រជាពលរដ្ឋទាំងអស់ ដែលជានិច្ចកាលថ្នាក់ដឹកនាំតែងតែគិតគូរពីសុខទុក្ខ សុខុមាលភាព និងជីវភាពរស់នៅរបស់ប្រជាពលរដ្ឋនៅគ្រប់កាលៈទេសៈ។
លោកស្នងការរង បានលើកឡើងថា ក្រោមការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយរបស់ សម្តេចតេជោ ហ៊ុន សែន ប្រធានព្រឹទ្ធសភា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ប្រទេសជាតិយើងទទួលបានសន្តិភាពពេញលេញ និងការអភិវឌ្ឍលើគ្រប់វិស័យ។ ទោះបីជាកន្លងមក មានការរំលោភបំពានលើបូរណភាពទឹកដីនៅតាមបន្ទាត់ព្រំដែន បង្កឱ្យមានការភៀសខ្លួនពីភ្លើងសង្គ្រាមយ៉ាងណាក្តី ក៏រាជរដ្ឋាភិបាល និងរដ្ឋបាលខេត្តកំពង់ធំ ដែលមាន ឯកឧត្តម នួន ផារ័ត្ន ជាអភិបាលខេត្ត តែងតែយកចិត្តទុកដាក់គៀងគរសប្បុរសជន ដើម្បីជួយសម្រាលការលំបាកជូនបងប្អូនជាបន្តបន្ទាប់។
ជាមួយគ្នានេះ លោកវរសេនីយ៍ឯក ម៉ង់ វិទូ ក៏បានពាំនាំនូវសារអប់រំ និងការផ្ដាំផ្ញើចំនួន ៦ចំណុចសំខាន់ៗដល់បងប្អូនប្រជាពលរដ្ឋ រួមមាន៖
រក្សាភាពស្ងប់ស្ងាត់ និងជឿជាក់៖ ទុកចិត្តលើការដោះស្រាយបញ្ហាព្រំដែនរបស់រាជរដ្ឋាភិបាលតាមផ្លូវច្បាប់ និងសន្តិវិធី។
គាំទ្រកងទ័ព៖ បន្តផ្តល់កម្លាំងចិត្ត និងគាំទ្រយ៉ាងពេញទំហឹងចំពោះវីរកងទ័ពដែលកំពុងការពារបូរណភាពទឹកដី។
ស្រឡាញ់សន្តិភាព៖ រួមគ្នាថែរក្សាសន្តិភាពដែលជាគ្រឹះនៃការអភិវឌ្ឍ។
គោរពច្បាប់៖ ចូលរួមអនុវត្តគោលនយោបាយភូមិ-ឃុំ មានសុវត្ថិភាព ដើម្បីសណ្តាប់ធ្នាប់សង្គម។
ថែទាំសុខភាព៖ រស់នៅមានអនាម័យ ដើម្បីជៀសផុតពីជំងឺដង្កាត់ផ្សេងៗ។
ខិតខំដាំដុះ និងចិញ្ចឹមសត្វបន្ថែម ដើម្បី ជីវភាពគ្រួសារឱ្យកាន់តែប្រសើរ។
ជាកិច្ចចុងក្រោយ លោកស្នងការរង បានប្រគល់អំណោយសប្បុរសធម៌ជូនដល់គ្រួសារនីមួយៗ រួមមាន៖
អង្ករ ២៥ គីឡូក្រាម
មីជាតិ ០១ កេស
ទឹកបរិសុទ្ធ ០១ កេស
ទឹកត្រី ០១ យួរ
ឃីត (សម្ភារៈប្រើប្រាស់) ០១ កញ្ចប់
ថវិកាចំនួន ៥០,០០០ រៀល។
គួរបញ្ជាក់ថា សកម្មភាពមនុស្សធម៌នេះ បានស្តែងឱ្យឃើញពីសាមគ្គីភាព និងការយកចិត្តទុកដាក់ខ្ពស់របស់កងកម្លាំងនគរបាលជាតិ ចំពោះសុខទុក្ខរបស់ប្រជាពលរដ្ឋនៅមូលដ្ឋាន៕ដោយ អ៊ួង សុផាត