(កំពង់ធំ)៖ លោកជំទាវ យស ថានារី សមាជិករដ្ឋសភា បានសង្កត់ធ្ងន់ថា ស្មារតីសាមគ្គីភាពរវាងសមរភូមិក្រោយ និងសមរភូមិមុខ គឺជាកម្លាំងចលករយ៉ាងសំខាន់ក្នុងការការពារបូរណភាពទឹកដី ខណៈលោកជំទាវអញ្ជើញចុះសាកសួរសុខទុក្ខ និងចែកអំណោយជូនគ្រួសារភៀសសឹកចំនួន ១០០ គ្រួសារ។
ពិធីសំណេះសំណាលនេះ បានប្រព្រឹត្តទៅនៅថ្ងៃទី០៥ ខែមករា ឆ្នាំ២០២៦ (ឆ្នាំបច្ចុប្បន្ន) នៅសាលាស្រុកកំពង់ស្វាយ ខេត្តកំពង់ធំ ដោយមានការអមដំណើរពីសំណាក់ លោកជំទាវ សៀង លី, លោកជំទាវ ហុក ផល្លី សមាជិកក្រុមប្រឹក្សាខេត្ត និងលោក អ៊ុត វណ្ណរ៉ា អភិបាលស្រុកកំពង់ស្វាយ ព្រមទាំងមន្ត្រីរាជការពាក់ព័ន្ធ។
ក្នុងឱកាសនោះ លោកជំទាវ យស ថានារី បានសម្តែងនូវការយល់ចិត្តចំពោះការលំបាករបស់បងប្អូនប្រជាពលរដ្ឋ ដែលត្រូវចាកចេញពីផ្ទះសម្បែងដោយសារស្ថានភាពនៅតាមបន្ទាត់ព្រំដែន។ លោកជំទាវបានបញ្ជាក់ថា៖
ជំហររាជរដ្ឋាភិបាល៖ កំពុងដោះស្រាយបញ្ហាប្រឈមតាមរយៈវិធានការការទូតយ៉ាងមុះមុត និងកម្លាំងការពារ ដោយឈរលើគោលការណ៍ច្បាប់អន្តរជាតិ។
សូមឱ្យប្រជាពលរដ្ឋរក្សាការអត់ធ្មត់ រួមសាមគ្គីគ្នា និងផ្តល់ការជឿជាក់លើការដឹកនាំរបស់រាជរដ្ឋាភិបាល ក៏ដូចជាវីរកងទ័ពដែលកំពុងឈរជើងនៅជួរមុខ។
លោកជំទាវសមាជិករដ្ឋសភា ក៏បានផ្តល់អនុសាសន៍សំខាន់ៗដល់អាជ្ញាធរ និងប្រជាពលរដ្ឋរួមមាន៖
ត្រូវតាមដាន និងរាយការណ៍រាល់ផលលំបាករបស់ពលរដ្ឋមកថ្នាក់លើឱ្យទាន់ពេលវេលា ដើម្បីផ្គត់ផ្គង់ស្បៀង និងសម្ភារឱ្យបានគ្រប់គ្រាន់។
ត្រូវថែទាំសុខភាពឱ្យបានល្អ ជាពិសេសយកចិត្តទុកដាក់លើកុមារតូចៗ ដើម្បីកុំឱ្យរអាក់រអួលដល់ការសិក្សារៀនសូត្ររបស់ពួកគេ។
«អំណោយនាពេលនេះ ទោះបីមានចំនួនតិចតួច ប៉ុន្តែវាជាស្មារតីសាមគ្គីភាព និងមនុស្សធម៌ ដើម្បីជួយសម្រាលការលំបាក និងជាកម្លាំងចិត្តដល់បងប្អូនដែលកំពុងជួបគ្រាអាសន្ន»។ នេះជាប្រសាសន៍បន្ថែមរបស់លោកជំទាវ។
សូមបញ្ជាក់ថា គ្រួសារភៀសសឹកទាំង ១០០ គ្រួសារ ទទួលបានអំណោយឧបត្ថម្ភក្នុងម្នាក់ៗ រួមមាន៖ ឃីត ១ កញ្ចប់ និងថវិកាចំនួន ៥០,០០០ រៀល ដើម្បីជួយដោះស្រាយជីវភាពបណ្តោះអាសន្ន៕
