ខេត្តសៀមរាប ៖ កាលពីថ្ងៃអាទិត្យ ទី២១ ខែធ្នូ ឆ្នាំ២០២៥ ឯកឧត្តមបណ្ឌិត ឈៀង ច័ន្ទតារា ប្រធានសមាគមសហគ្រិនបញ្ញវន្តកម្ពុជា និងជាប្រធានសាខាបញ្ញវន្តតេជោនៃផែនសហគ្រិនវ័យក្មេងក្រុមការងារយុវជនគណបក្សប្រជាជនកម្ពុជារាជធានីភ្នំពេញ បានដឹកនាំក្រុមការងារ នាំយកអំណោយរបស់ឯកឧត្តម លោកជំទាវ លោកឧកញ៉ា លោក លោកស្រី ដែលជាទីប្រឹក្សា អនុប្រធាន សមាជិក សមាជិកា របស់សមាគម និងបណ្ដាសប្បុរសជនផ្សេងៗទៀត ដើម្បីប្រគល់ជូនវរៈកងទ័ពជួរមុខដែលកំពុងឈរជើងយ៉ាងរឹងមាំការពារព្រំដែនដ៏អង់អាចក្លាហាន និងជូនដល់ពលរដ្ឋភៀសសិកចំនួន់ ២០០គ្រួសារ ព្រមទាំងរដ្ឋបាលខេត្តបន្ទាយមានជ័យ និងរដ្ឋបាលស្រុកបន្ទាយស្រី ព្រមទាំងប្រគេនដល់ព្រះសង្ឃដែលគង់នៅវត្តបាលីដំរីក្រាប ដែលក្នុងនោះដែរ ឯកឧត្តម បានពាំនាំនូវការផ្តាំផ្ញើ ការនឹករឭកនិងសួរសុខទុក្ខពីសំណាក់ឯកឧត្តម សុខ ពុទ្ធិវុធ និងលោកជំទាវ ព្រមទាំងឯកឧត្តមបណ្ឌិត អោម សេងបូរ៉ា និងលោកជំទាវ ដែលបានគាំទ្រនិងចូលរួមចំណែកក្នុងការឧបត្ថម្ភដល់សមាគមរួមជាមួយសប្បុរសជននានា ចុះបំពេញបេសកកម្មមនុស្សធម៌ ដើម្បីសួរសុខទុក្ខ និងនាំយកអំណោយជូនដល់វរកងទ័ពជួរមុខ ប្រជាពលរដ្ឋភៀសសិកខ្វះខាត និងរដ្ឋបាលមូលដ្ឋាន។
ក្នុងឱកាសនោះ ឯកឧត្តមបណ្ឌិត ប្រធានសមាគម បានពាំនាំនូវការផ្ដាំផ្ញើសួរសុខទុក្ខពីសំណាក់ថ្នាក់ដឹកនាំ ក៏ដូចជាការចូលរួមចំណែកយ៉ាងសកម្មពីសមាជិក សមាជិកា និងសប្បុរសជន ដើម្បីលើកទឹកចិត្តដល់កងកម្លាំងដែលកំពុងឈរជើងការពារបូរណភាពទឹកដី និងជួយសម្រាលទុក្ខលំបាករបស់ប្រជាពលរដ្ឋភៀសសិក។
យោងតាមរបាយការណ៍ អំណោយជាស្បៀងអាហារនិងសម្ភារ:សរុបដែលមានតម្លៃជាទឹកប្រាក់ចំនួន ២៨,៧៤៤,០០០ រៀល (ម្ភៃប្រាំបីលាន ប្រាំពីររយសែសិបបួនពាន់រៀល) ត្រូវបានបែងចែកជូនទៅដល់គោលដៅចំនួន ៦ រួមមាន៖
កងទ័ពជួរមុខ៖ ប្រគល់ជូន ឯកឧត្តមនាយឧត្តមសេនីយ៍ ណុប រតនា មេបញ្ជាការបញ្ជាការដ្ឋានកាំភ្លើងធំ ចំនួន ៥,៦២៣,០០០ រៀល។
កងពលតូចថ្មើរជើងលេខ៤២៖ ប្រគល់ជូន ឯកឧត្តម ឧត្តមសេនីយ៍ត្រី នាក់ វង្ស ចំនួន ៥,៦២៣,០០០ រៀល។
រដ្ឋបាលខេត្តបន្ទាយមានជ័យ៖ ប្រគល់ជូន ឯកឧត្តម អ៊ុ រាត្រី អភិបាលនៃគណៈអភិបាលខេត្ត ចំនួន ៥,០៧២,០០០ រៀល។
រដ្ឋបាលស្រុកបន្ទាយស្រី៖ ឧបត្ថម្ភថវិកាចំនួន ១,២៧០,០០០ រៀល។
វិស័យសាសនា៖ ប្រគេនដល់ព្រះសង្ឃគង់នៅវត្តបាលីដំរីក្រាប ចំនួន ៥៥៦,០០០ រៀល។
ប្រជាពលរដ្ឋខ្វះខាត៖ ចែកជូនប្រជាពលរដ្ឋភៀសសឹកចំនួន ២០០គ្រួសារ សរុបជាទឹកប្រាក់ ១០,៦០០,០០០ រៀល។
សកម្មភាពនេះ បានបង្ហាញពីសាមគ្គីភាព និងទឹកចិត្តសប្បុរសធម៌របស់សមាគមសហគ្រិនបញ្ញវន្តកម្ពុជា ក្នុងការចូលរួមចំណែកជាមួយរាជរដ្ឋាភិបាល ដើម្បីចូលរួមចំណែកជួយសម្រាលជីវភាពប្រជាជនភៀសសិក និងគាំទ្រដល់កងកម្លាំងប្រដាប់អាវុធដែលកំពុងបំពេញភារកិច្ចដ៏ងអង់អាចការពារបូរណភាពទឹកដី៕
