អភិបាលខេត្តកំពង់ធំ ចុះជួបពលរដ្ឋភៀសសឹក ៣ទីតាំង ក្នុងស្មារតី «ខ្មែរជួយខ្មែរ»

ដោយ អ៊ួង សុផាត÷}(កំពង់ធំ)៖ ក្នុងស្មារតីយកចិត្តទុកដាក់ខ្ពស់ចំពោះសុខទុក្ខប្រជាពលរដ្ឋ នាព្រឹកថ្ងៃទី១៩ ខែធ្នូ ឆ្នាំ២០២៥ ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ បានអញ្ជើញចុះសំណេះសំណាល និងនាំយកអំណោយសង្គ្រោះបឋម ចែកជូនបងប្អូនប្រជាពលរដ្ឋជនភៀសសឹកចំនួន ៣០៧គ្រួសារ ដែលកំពុងស្នាក់នៅបណ្ដោះអាសន្នតាមទីវត្តអារាមនានា ក្នុងក្រុងស្ទឹងសែន។
សកម្មភាពមនុស្សធម៌នេះត្រូវបានបែងចែកជា ៣ទីតាំងផ្សេងគ្នា រួមមាន៖
១. វត្តក្រចាប់៖ ចំនួន ១៤៧គ្រួសារ
២. វត្តទេពនិម្មិត៖ ចំនួន ៩៣គ្រួសារ
៣. វត្តសែនសិរី៖ ចំនួន ៧២គ្រួសារ
ក្នុងឱកាសនោះ ឯកឧត្តមអភិបាលខេត្ត បានពាំនាំនូវការផ្ដាំផ្ញើសាកសួរសុខទុក្ខយ៉ាងជ្រាលជ្រៅពីសំណាក់ សម្តេចតេជោ ហ៊ុន សែន ប្រធានព្រឹទ្ធសភា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលជានិច្ចកាល សម្តេចទាំងទ្វេតែងតែបារម្ភ និងតាមដានជាប់ជាប្រចាំនូវស្ថានភាពរស់នៅរបស់បងប្អូនកងទ័ពជួរមុខ និងជនភៀសសឹកទាំងអស់។
ឯកឧត្តម នួន ផារ័ត្ន បានសង្កត់ធ្ងន់ថា ទោះបីសភាពការណ៍នៅតាមព្រំដែនមានភាពតានតឹង ដោយសារការរំលោភបំពានអធិបតេយ្យភាពពីសំណាក់ភាគីយោធាថៃ ប៉ុន្តែថ្នាក់ដឹកនាំរាជរដ្ឋាភិបាលមិនបានសម្រាកឡើយ ដោយបាននិងកំពុងបញ្ជាផ្ទាល់ ដើម្បីការពារបូរណភាពទឹកដីឱ្យបានរឹងមាំបំផុត។
ជាមួយគ្នានោះដែរ ឯកឧត្តមអភិបាលខេត្ត ក៏បានថ្លែងអំណរគុណយ៉ាងជ្រាលជ្រៅចំពោះ សប្បុរសជនគ្រប់ទិសទី ដែលបានបរិច្ចាគធនធានផ្ទាល់ខ្លួន ជួយឧបត្ថម្ភដល់រដ្ឋបាលខេត្ត ដើម្បីគាំទ្រដល់កម្លាំងជួរមុខ និងជួយសម្រាលទុក្ខលំបាកប្រជាពលរដ្ឋ។ ឯកឧត្តមបានបញ្ជាក់ថា៖
«នេះគឺជាស្មារតីសាមគ្គីភាព “ខ្មែរជួយខ្មែរ” ដែលមិនបោះបង់គ្នាក្នុងគ្រាលំបាក។ ស្មារតីស្នេហាជាតិដ៏ពុះកញ្ជ្រោលរបស់ប្រជាជន និងភាពក្លាហានរបស់កងទ័ពយើង គឺជាអាវុធដ៏ស័ក្តិសិទ្ធិបំផុតក្នុងការការពារមាតុភូមិ»។