ខេត្តកំពង់ស្ពឺ ៖ ព្រឹកថ្ងៃទី១១ ខែធ្នូ ឆ្នាំ២០២៥ នៅវិមានឯករាជ្យ ខេត្តកំពង់ស្ពឺ ឯកឧត្តមបណ្ឌិត ជាមច័ន្ន សុភ័ណ្ឌ អភិបាលនៃគណៈអភិបាលខេត្តកំពង់ស្ពឺ ឯកឧត្តម ហុង ឆេងឈុន សមាជិកក្រុមប្រឺក្សាខេត្ត បានអញ្ជើញទទួលនូវសម្ភារៈមួយចំនួននិងថវិការ ដែលជាការចូលរួមបរិច្ចាកពីសប្បុរសជននានានិងគ្រប់មជ្ឈដ្ឋាន សម្រាប់ជួយគាំទ្រដល់កងទ័ពជួរមុខកំពុងឈរជើងប្រយុទ្ធនិងការពារយ៉ាងរឹងមាំតាមខ្សែបន្ទាត់ព្រំដែនកម្ពុជា ថៃ និងជនភៀសសឹករាប់ពាន់គ្រួសារដែលបានភៀសខ្លួនចេញពីលំនៅដ្ឋានដោយសារសង្គ្រាមឈ្លានពានដ៏សែនឃោឃៅរបស់យោធាថៃនៅតាមព្រំដែន។
ទន្ទឹមនោះដែរ ឯកឧត្តម ហុង ឆេងឈុន សមាជិកក្រុមប្រឺក្សាខេត្ត និងជាអគ្គនាយកបុរីឈុនទីន បានចូលរួមជាមួយរដ្ឋបាលខេត្តកំពង់ស្ពឺ បរិច្ចាកជាគ្រឿងឧបភោគបរិភោគមួយចំនួនសម្រាប់គាំទ្រវីរៈកងទ័ពដែលកំពុងប្រយុទ្ធនិងឈរជើងការពារយ៉ាងរឹងមាំនៅតាមខ្សែបន្ទាប់ព្រំដែន និងជនភៀសសឹករាប់ពាន់គ្រួសាររួមមាន ៖
១.អង្ករ ១ តោន
២.មីយើង ១០០ កេស
៣.ទឹកសុទ្ធប្រូវីដា ១០០ កេស
៤.ថវិកាចំនួន ២លានរៀល
ឯកឧត្តម ហុង ឆេងឈុន សមាជិកក្រុមប្រឺក្សាខេត្ត និងជាអគ្គនាយកបុរីឈុនទីន បានអោយដឹងថា ឯកឧត្តមនិងគៀងគរស្វែងរកការឧបត្ថម្ភពីសប្បុរសជននានាដើម្បីជួយដល់វរៈកងទ័ពជាតិដែលកំពុងបូជាសាច់ស្រស់ឈាមស្រស់ ការពារជាតិមាតុភូមិពីការឈ្លានពានរបស់យោធាថៃចូលដែនអធិបតេយ្យរបស់យើងយ៉ាងអង់អាច និងជួយសម្រាលបន្ទុកលំបាកដល់ជនភៀសសិកដែលបានភៀសខ្លួនមកនៅជំរុំដែលរៀបចំដោយអាជ្ញាធរមូលដ្ឋានដោយសារសង្គ្រាមឈ្លានពានដ៏ឃោឃៅរបស់ថៃ។
ប្រជាពលរដ្ឋបានសស្រាក់សស្រាំជួយឧបត្ថម្ភនិងគាំទ្រទាំង កម្លាំងកាយនិងកម្លាំងចិត្ត សម្ភារៈ ថវិកា ជូនដល់វរៈកងទ័ពជាតិ និងបងប្អូនជនភៀសសឹក សបង្ហាញពិទឹកចិត្តដ៏ថ្លៃថ្លារបស់សប្បុរជនខ្មែរ ស្រឡាញ់ខ្មែរ ខ្មែរជួយខ្មែរ និងបង្ហាញឲ្យឃើញពីកម្លាំងសាមគ្គីនិងរួមរួមគ្នាជាធ្លុងមួយក្នុងស្មារតីមហាគ្រួសារខ្មែរតែមួយ។
រដ្ឋបាលខេត្តកំពង់ស្ពឺនិងបន្តការទទួលនូវការឧបត្ថម្ភពីសប្បុរជននានា ជាបន្តបន្ទាប់៕ដោយ គង់ សិលា
