ភ្នំពេញ៖ ក្រោយបញ្ចប់ការសាកសួរ ទីបំផុតស្នងការដ្ឋាននគរបាលរាជធានីភ្នំពេញ បានសម្រេចកសាងសំណុំរឿងបញ្ជូនខ្លួនថៅកែ និងមេការនាំចូលសាច់បង្កកខុសច្បាប់ចំនួន ២នាក់ ទៅកាន់តុលាការ ដើម្បីចាត់ការតាមនីតិវិធីច្បាប់។
ជនសង្ស័យទាំង ២នាក់ ដែលត្រូវបញ្ជូនទៅតុលាការ រួមមាន៖
ឈ្មោះ ភុត ប៊ុនហម៖ (ត្រូវជាប្ដីរបស់ឈ្មោះ អ៉ឹម សុផាន់ណារ៉ា) ជាម្ចាស់ឃ្លាំងស្តុកសាច់បង្កក ស្ថិតក្នុងសង្កាត់គោកកា ខណ្ឌព្រែកព្នៅ។
ឈ្មោះ អ៊ុក សុក្របញ្ញារិទ្ធ៖ ជាមេការ (ចែញ៉) គ្រប់គ្រងឃ្លាំងស្តុកសាច់បង្កក ស្ថិតក្នុងសង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
ជាមួយគ្នានេះ សមត្ថកិច្ចកងរាជអាវុធហត្ថ និងនគរបាល ក៏កំពុងបន្តស្រាវជ្រាវយ៉ាងក្តៅគគុក ដើម្បីតាមប្រម៉ាញ់និងចាប់ខ្លួនអ្នកពាក់ព័ន្ធផ្សេងទៀតយកមកផ្តន្ទាទោសផងដែរ។
គួររំលឹកផងដែរថា នៅក្នុងប្រតិបត្តិការចុះបង្ក្រាបទីតាំងឃ្លាំងស្តុកទំនិញរបស់ថៅកែទាំង ២នាក់ខាងលើ អាជ្ញាធររាជធានីភ្នំពេញ សហការជាមួយសមត្ថកិច្ចជំនាញ បានរកឃើញ និងដកហូតសាច់មាន់បង្កក រួមមាន ជើងមាន់ ជង្គង់មាន់ និងស្លាបមាន់ ដែលនាំចូលពីប្រទេសថៃដោយគ្មានច្បាប់អនុញ្ញាត សរុបមានចំនួនជាង ២០០តោន។
ព័ត៌មានបន្ថែម៖ ពាក់ព័ន្ធនឹងករណីនាំចូលសាច់បង្កក និងគ្រឿងក្នុងមាន់ខុសច្បាប់ពីប្រទេសថៃនេះ សម្ដេចតេជោ ហ៊ុន សែន នឹងធ្វើការសាកសួរទៅកាន់ថៅកែទាំងនោះដោយផ្ទាល់ ដើម្បីស្វែងរកមន្ត្រីខិលខូច និងអ្នកនៅពីក្រោយខ្នង ដែលមានការពាក់ព័ន្ធ យកមកទទួលខុសត្រូវចំពោះមុខច្បាប់ជាធរមាន ដោយគ្មានការលើកលែងឡើយ៕
