លោកឧត្តមសេនីយ៍ទោ សោម ស៊ុន ចុះពិនិត្យការអភិវឌ្ឍ និងសួរសុខទុក្ខគ្រួសារអតីតយុទ្ធជន ១៤១គ្រួសារ នៅមណ្ឌលតេជោធិបតីថ្លុកព្រីង រយៈពេល ៥ឆ្នាំក្រោយទទួលបានដីធ្លី និងផ្ទះសម្បែង

ខេត្តកំពង់ធំ៖ នៅព្រឹកថ្ងៃទី១១ ខែមិថុនា ឆ្នាំ(២០២៦) ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានប្រចាំការ និងជាប្រធានលេខាធិការដ្ឋាន នៃគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ បានដឹកនាំសហការីចុះត្រួតពិនិត្យការអភិវឌ្ឍថ្មីៗ និងសំណេះសំណាលសាកសួរសុខទុក្ខបងប្អូនអតីតយុទ្ធជនចំនួន ១៤១គ្រួសារ (វគ្គទី១) ដែលកំពុងរស់នៅក្នុងមណ្ឌលអភិវឌ្ឍន៍អតីតយុទ្ធជន មរតកតេជោធិបតីថ្លុកព្រីង ស្ថិតក្នុងឃុំក្រយា ស្រុកសន្ទុក ខេត្តកំពង់ធំ។
ការផ្ដល់ដីសម្បទានសង្គមកិច្ច និងផ្ទះស្នាក់នៅ
លោកឧត្តមសេនីយ៍ទោ សោម ស៊ុន បានបញ្ជាក់ថា បងប្អូនអតីតយុទ្ធជនវគ្គទី១ ទាំង ១៤១គ្រួសារ បានមករស់នៅលើដីធ្លី និងផ្ទះថ្មីក្នុងមណ្ឌលអភិវឌ្ឍន៍នេះ មានរយៈពេលជាង ៥ឆ្នាំមកហើយ។ ពួកគាត់បានធ្វើការចាប់ឆ្នោតទទួលយកដីសម្បទានសង្គមកិច្ច ដោយក្នុងមួយគ្រួសារទទួលបានដីទំហំ ១ហិកតាកន្លះ និងផ្ទះថ្មីមួយខ្នង ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈឯកឧត្តមទេសរដ្ឋមន្ត្រី នាយឧត្តមសេនីយ៍កិត្តិសង្គហបណ្ឌិត គន់ គីម អនុប្រធានប្រចាំការ និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា កាលពីថ្ងៃទី២១ ខែឧសភា ឆ្នាំ២០២១។
សមិទ្ធផលហេដ្ឋារចនាសម្ព័ន្ធរូបវន្ត និងការគាំទ្រពីថ្នាក់ដឹកនាំ
នៅក្នុងរយៈពេលប្រាំឆ្នាំកន្លងមកនេះ ជីវភាពនិងការរស់នៅរបស់បងប្អូនអតីតយុទ្ធជន ត្រូវបានយកចិត្តទុកដាក់ខ្ពស់តាមរយៈការបង្កើតហេដ្ឋារចនាសម្ព័ន្ធជាច្រើន រួមមាន៖
ផ្លូវថ្នល់ និងប្រភពទឹក៖ សម្ដេចតេជោ ហ៊ុន សែន អតីតនាយករដ្ឋមន្ត្រី បានស្ថាបនាផ្លូវលំក្រាលគ្រួសក្រហមប្រវែងជាង ១០គីឡូម៉ែត្រ, បុកអណ្ដូងទឹកស្អាតចំនួន ៦៣អណ្ដូង និងជីកស្រះទឹកទំហំ ៣០ម៉ែត្រ គុណនឹង ៤០ម៉ែត្រ ជម្រៅ ៣ម៉ែត្រ តាមរយៈក្រសួងអភិវឌ្ឍន៍ជនបទ សម្រាប់ប្រើប្រាស់ក្នុងជីវភាពប្រចាំថ្ងៃ។
ប្រព័ន្ធអគ្គិសនី៖ ឯកឧត្តមរដ្ឋមន្ត្រីក្រសួងរ៉ែ និងថាមពល បានតបណ្ដាញអគ្គិសនីតាមផ្លូវមេរួចរាល់ ដែលបច្ចុប្បន្នគ្រួសារមួយចំនួនធំបានតភ្ជាប់បណ្ដាញចូលក្នុងផ្ទះរួចរាល់ហើយ។
ភ្លើងបំភ្លឺផ្លូវ៖ ឯកឧត្តម នួន ផារ័ត្ន អភិបាលខេត្ត និងជាប្រធានសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ បានឧបត្ថម្ភបន្ទះសូឡាដាក់បំភ្លឺតាមដងផ្លូវចំនួន ៧៥បង្គោល។
សាលប្រជុំសហគមន៍៖ ថ្មីៗនេះ ឯកឧត្តមអភិបាលខេត្ត ក៏បានផ្ដល់ថវិកាបន្ថែមចំនួន ១០,០០០ដុល្លារអាមេរិក សម្រាប់សាងសង់សាលប្រជុំមួយខ្នង ទំហំ ៣៦០ម៉ែត្រការ៉េ ទុកជាកន្លែងជួបជុំក្នុងពិធីផ្សេងៗ។
ការប្រែប្រួលមុខមាត់ថ្មីនៃជីវភាពរស់នៅ
លោកមេបញ្ជាការតំបន់ប្រតិបត្តិការសឹករងខេត្ត បានបន្ថែមថា បច្ចុប្បន្នបងប្អូនអតីតយុទ្ធជនបានកសាងជីវភាពថ្មីយ៉ាងរឹងមាំ ដោយបានដាំបន្លែបង្ការ និងចិញ្ចឹមសត្វ។ អ្វីដែលជាមោទនភាពនោះ គឺបងប្អូនបានរួមគ្នារៀបចំជាសហគមន៍ដាំដុះដំណាំស្វាយចន្ទីលើផ្ទៃដីប្រមាណជាង ១៨៦ហិកតា ដែលក្នុងនោះមួយចំនួនប្រមូលផលបានជាបណ្ដើរៗហើយ និងមួយចំនួនទៀតកំពុងដុះលូតលាស់ត្រៀមប្រមូលផលជាបន្តបន្ទាប់នៅឆ្នាំខាងមុខ។
ឆ្លៀតក្នុងឱកាសនោះដែរ បងប្អូនអតីតយុទ្ធជនទាំងអស់ បានសម្ដែងនូវក្តីរំភើបរីករាយឥតឧបមា និងបានគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែផ្ដល់ក្តីសង្ឃឹម និងការគាំទ្រយ៉ាងពេញទំហឹងក្នុងការកសាងជីវភាពថ្មីនៅលើទឹកដីអភិវឌ្ឍន៍ មរតកតេជោធិបតីថ្លុកព្រីង ទាំងក្នុងពេលបច្ចុប្បន្ន និងទៅអនាគត៕