ផ្ទះ ៣៥ខ្នងទៀត កំពុងសាងសង់ត្រៀមប្រគល់ជូនអតីតយុទ្ធជនគ្មានដីគ្មានផ្ទះ នៅខេត្តកំពង់ធំ

ខេត្តកំពង់ធំ៖ នៅរសៀលថ្ងៃទី១១ ខែមិថុនា ឆ្នាំ២០២៦ លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានប្រចាំការ និងជាប្រធានលេខាធិការដ្ឋាន តំណាងឯកឧត្តម នួន ផារ័ត្ន អភិបាលខេត្ត និងជាប្រធានគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ បានដឹកនាំសហការីចុះត្រួតពិនិត្យការសាងសង់ផ្ទះថ្មីចំនួន ៣៥ខ្នងបន្ថែមទៀត។
ផ្ទះទាំងនេះជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលកំពុងសាងសង់នៅក្នុងមណ្ឌលអភិវឌ្ឍន៍អតីតយុទ្ធជន មរតកតេជោធិបតីថ្លុកព្រីង ស្ថិតក្នុងឃុំក្រយា ស្រុកសន្ទុក ដើម្បីត្រៀមប្រគល់ជូនគ្រួសារអតីតយុទ្ធជនដែលគ្មានដី គ្មានផ្ទះពិតប្រាកដ។
លោកឧត្តមសេនីយ៍ទោ សោម ស៊ុន បានបញ្ជាក់ថា នៅក្នុងមណ្ឌលអភិវឌ្ឍន៍អតីតយុទ្ធជន មរតកតេជោធិបតីថ្លុកព្រីង មានផែនការសាងសង់ផ្ទះសរុបចំនួន ២៤១ខ្នង ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវ ដោយបែងចែកជា ៣ដំណាក់កាលរួមមាន៖
ដំណាក់កាលទី១ (ខែឧសភា ឆ្នាំ២០២១): សាងសង់បានចំនួន ១៤១ខ្នងផ្ទះ រួមនឹងការប្រគល់ដីសម្បទានសង្គមកិច្ចចំនួន ១,៥ ហិកតា ក្នុងមួយគ្រួសារ។
ដំណាក់កាលទី២ (ខែកុម្ភៈ ឆ្នាំ២០២Valid៥): សាងសង់បានចំនួន ៦៥ខ្នងផ្ទះ រួមនឹងការប្រគល់ដីសម្បទានសង្គមកិច្ចចំនួន ១ហិកតា ក្នុងមួយគ្រួសារ។
ដំណាក់កាលទី៣ (ចាប់ផ្តើមខែឧសភា ឆ្នាំ២០២៦): កំពុងដំណើរការសាងសង់ចំនួន ៣៥ខ្នងផ្ទះ ដោយផ្តល់ដីលំនៅឋានទំហំ ១,២០០ ម៉ែត្រការ៉េ និងគ្រង់រៀបចំដីសម្រាប់បង្កបង្កើនផលដោយឡែកបន្ថែមទៀត។
ទោះជាយ៉ាងណាក៏ដោយ លោកមេបញ្ជាការបានបន្ថែមថា សម្រាប់គ្រួសារអតីតយុទ្ធជនចំនួន ១០០គ្រួសារ ក្នុងដំណាក់កាលទី២ និងទី៣ នេះ កំពុងជួបការលំបាកផ្នែកហេដ្ឋារចនាសម្ព័ន្ធផ្លូវថ្នល់ ដោយសាររដូវវស្សាមានទឹកជន់លិច ធ្វើឱ្យប៉ះពាល់ដល់ការធ្វើដំណើរ និងខូចខាតដំណាំដាំដុះមួយចំនួន។
វឌ្ឍនភាពផ្នែកទឹកស្អាត៖ បច្ចុប្បន្ន ក្រសួងអភិវឌ្ឍន៍ជនបទបានដំណើរការបុកអណ្ដូងទឹកស្អាតចំនួន ១៣អណ្ដូង រួចរាល់សម្រាប់ឱ្យបងប្អូនប្រើប្រាស់ និងកំពុងស្នើសុំបុកអណ្ដូងបន្ថែមចំនួន ២៥អណ្ដូងទៀត ដើម្បីធានាការផ្គត់ផ្គង់ទឹកស្អាតដល់គ្រួសារអតីតយុទ្ធជនដែលនឹងត្រូវមករស់នៅថ្មីបន្ថែមទៀត។
បងប្អូនក្រុមគ្រួសារអតីតយុទ្ធជន ដែលកំពុងរស់នៅក្នុងមណ្ឌលអភិវឌ្ឍន៍ បានសម្តែងនូវការគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្ដេចតេជោ ហ៊ុន សែន, សម្ដេចកិត្តិព្រឹទ្ធបណ្ឌិត, សម្ដេចធិបតី ហ៊ុន ម៉ាណែត និងលោកជំទាវ ដែលតែងតែយកចិត្តទុកដាក់ជួយដោះស្រាយរាល់ការលំបាកគ្រប់បែបយ៉ាង និងបានគោរពជូនពរសម្តេច និងលោកជំទាវ សូមជួបប្រទះតែនឹងពុទ្ធពរទាំងបួនប្រការកុំបីឃ្លៀងឃ្លាតឡើយ៕ដោយ អ៊ួង សុផាត