(កំពង់ធំ)៖ នាព្រឹកថ្ងៃទី២១ ខែមេសា ឆ្នាំ២០២៦ នៅស្នាក់ការគណបក្សស្រុកស្ទោង ឯកឧត្តម ងួន រាសី ប្រធានយុវជនគណបក្សប្រជាជនកម្ពុជាខេត្តកំពង់ធំ បានអញ្ជើញជាអធិបតីក្នុងពិធីបើកវគ្គបំពាក់បំប៉នបច្ចេកទេសស្តីពី “ការងារសម្របសម្រួលព័ត៌មាន និងបណ្តាញផ្សព្វផ្សាយសង្គម”។ វគ្គបណ្តុះបណ្តាលនេះមានការអញ្ជើញចូលរួមពីសិក្ខាកាមសរុបចំនួន ១៥២នាក់ (ស្រី ៤៨នាក់)។
វគ្គបំពាក់បំប៉ននេះរៀបចំឡើងក្នុងគោលដៅយុទ្ធសាស្ត្រសំខាន់ៗរួមមាន៖
ពង្រឹងសមត្ថភាព និងចំណេះដឹងលើជំនាញសម្របសម្រួលព័ត៌មាន។
បង្កើនប្រសិទ្ធភាពក្នុងការផ្សព្វផ្សាយព័ត៌មានឱ្យបានទាន់សភាពការណ៍។
តម្រង់ទិសការប្រើប្រាស់បណ្តាញសង្គមឱ្យបានត្រឹមត្រូវ និងសមស្របតាមបរិបទបច្ចុប្បន្ន។
ក្នុងឱកាសនោះ ឯកឧត្តម ងួន រាសី បានសង្កត់ធ្ងន់ថា ក្នុងយុគសម័យឌីជីថល ការងារព័ត៌មានគឺជាអាវុធដ៏សំខាន់។ ឯកឧត្តមបានមានប្រសាសន៍ថា៖
“ការបញ្ជូនព័ត៌មានត្រូវតែមានភាពច្បាស់លាស់ លឿនរហ័ស និងមានប្រសិទ្ធភាព ដើម្បីឆ្លើយតបបានទាន់ពេលវេលាទៅនឹងសកម្មភាពនានាក្នុងសង្គម។”
ទន្ទឹមនឹងនេះ ឯកឧត្តមបានជំរុញឱ្យសិក្ខាកាមទាំងអស់ ត្រូវយកចិត្តទុកដាក់ក្រេបជញ្ជក់ចំណេះដឹង និងបទពិសោធន៍ពីគ្រូឧទ្ទេស ដើម្បីយកទៅអនុវត្តជាក់ស្តែងក្នុងអង្គភាព និងមូលដ្ឋានរបស់ខ្លួនឱ្យកាន់តែល្អប្រសើរឡើង។
ជាកិច្ចបញ្ចប់ ពិធីបើកវគ្គបំពាក់បំប៉ននេះបានប្រព្រឹត្តទៅក្នុងបរិយាកាសស្និទ្ធស្នាល និងសកម្មបំផុត។ សិក្ខាកាមទាំងអស់បានបង្ហាញនូវឆន្ទៈខ្ពស់ក្នុងការបង្កើនសមត្ថភាព ដើម្បីក្លាយជាប្រតិបត្តិករព័ត៌មានដ៏មានសក្ដានុពល ដែលនឹងរួមចំណែកលើកកម្ពស់គុណភាពការងារផ្សព្វផ្សាយឱ្យកាន់តែទូលំទូលាយ និងមានឥទ្ធិពលវិជ្ជមានក្នុងសង្គម៕ដោយ អ៊ួង សុផាត
