ដោយ ៖ ភ្នំធំ / បន្ទាយមានជ័យ៖ កាលព្រឹកថ្ងៃចន្ទ ថ្ងៃទី០៩ ខែមីនា ឆ្នាំ២០២៦ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដឹកនាំកម្លាំងនគរបាលទូទាំងខេត្ត គោរពទង់ជាតិ នៃព្រះរាជាណាចក្រកម្ពុជានិងថ្លែងផ្ទាល់មាត់នូវខ្លឹមសារសំខាន់ៗទាក់ទិនការដឹកនាំ អនុវត្តការងារជំនាញសន្តិសុខ សណ្តាប់ធ្នាប់ សុវត្ថិភាពសង្គម, សន្តិសុខព្រហ្មទណ្ឌ និងសន្តិសុខតាមព្រំដែន ការងារអភិវឌ្ឍន៍និងធ្វើបច្ចុប្បន្នភាពជំនាញធនធានមនុស្ស ការអភិវឌ្ឍន៍កន្លែងធ្វើការ សមិទ្ធផល លទ្ធផលការងារ ការអន្តរាគមន៍ សង្គមនិងមនុស្សធម៌ជាដើម ។
លោកក៏លើកពីអនុស្សាវរីយ៍ជាមួយមន្ត្រីក្រោមឱវាទនិង អាជ្ញាធរ មានសមត្ថកិច្ចពាក់ព័ន្ធក្នុងអំឡុងរយ:ពេលនៃការបំពេញការងារជាស្នងការនៃស្នងការនគរបាលខេត្តបន្ទាយមានជ័យជាង៦ឆ្នាំ ២០២០- ២០២៦) កន្លងមកដែលមានត្រជាក់ ក្តៅ ផ្អែមល្ហែម ជូរចត់ លំបាក ស្មុគ្រស្មាញងាយស្រួល។
ពិសេសការចូលរួមសកម្ម ប្រកបដោយវីរ:ភាព ពលិកម្មដែលប៊ិះតែបាត់បង់ជីវិត លើកិច្ចការពារជាតិ មាតុភូមិបូរណភាព អធិបតេយ្យភាព និងព្រំដែនតទល់នឹងកម្លាំងយោធា នគរបាលថៃឈ្លានពាន ។
ក៏លើកខ្លីដែរពីការងារទស្សន: នយោបាយ ចលនាមហាជននិងគណបក្សដែលបានចិញ្ចឹមចលនានិងពង្រឹងពង្រីកសមាជិកគាំទ្រភ្លូកទឹក ភ្លូកដីលើគណបក្សប្រជាជនកម្ពុជាដែលជាគណបក្សកាន់អំណាច ។
សូមបញ្ជាក់ថា ពិធីគោរពទង់ជាតិនេះ មានការអញ្ជើញចូលរួមពី លោក លោកស្រី ឧត្តមសេនីយ៍ វរសេនីយ៍ ស្នងការរង លោក-លោកស្រី នាយការិយាល័យជំនាញ និងមន្រ្តីនគរបាលចំណុះស្នងការដ្ឋាននគរបាលខេត្តបន្ទាយមានជ័យ ជាច្រើនរូប។
លោកបានថ្លែងអំណរគុណ សូមអធ្យាស្រ័យ ចុងក្រោយលោកសូមលា និងជូនពរសុខភាពល្អ ជោគជ័យការងារដល់កងកម្លាំងបន្ទាប់ពីការផ្ទេរតួនាទី ភារកិច្ចនាថ្ងៃទី១១ខែមីនាឆ្នាំ២០២៦ ស្អែកនេះ។
សូមរំលឹកថា លោកឧត្តមសេនីយ៍ទោ សិទ្ធិ ឡោះ ត្រូវបានប្រកាសចូលកាន់មុខតំណែងជាស្នងការនគរបាលខេត្តបន្ទាយមានជ័យ ថ្ងៃទី០៧ ខែកញ្ញា ឆ្នាំ២០២០ ជំនួសលោកឧត្តមសេនីយ៍ទោ អាត់ ខែម ស្នងការចាស់វស្សា ដែលចូលនិវត្តន៍និងទទួលភារកិច្ចថ្មី ។
ហើយនាថ្ងៃទី១១ ខែមីនា ឆ្នាំ២០២៦ នឹងមានពិធីផ្ទេរភារកិច្ចលោកឧត្តមសេនីយ៍ទោ សិទ្ធិ ឡោះ ពីស្នងការនគរបាលខេត្តបន្ទាយមានជ័យឡើងទៅជាអនុប្រធាននាយកដ្ឋានកណ្តាលនគរបាលយុត្តិធម៌។
ចំណែកលោកឧត្តមសេនីយ៍ត្រី សឿម សារឹទ្ធ ស្នងការរងទទួលភស្តុភារ ហិរញ្ញវត្ថុនៃស្នងការដ្ឋាននគរបាលខេត្តបាត់ដំបងនឹងឡើងមកជាស្នងការនៃស្នងការដ្ឋាននគរបាលខេត្តបន្ទាយមានជ័យ ។នេះបើតាមអនុក្រឹត្យលេខ១៦៦អនក្រ/តត របស់រាជរដ្ឋាភិបាលស្តីពីការផ្ទេរភារកិច្ចនិងតែងតាំងមុខតំណែងមន្ត្រីនគរបាលជាតិចុះថ្ងៃទី០៣ខែមីនាឆ្នាំ២០២៦ ចុះហត្ថលេខាដោយសម្តេចធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ៕
