ថ្នាក់ដឹកនាំខេត្តកំពង់ឆ្នាំង ចុះសួរសុខទុក្ខ និងនាំយកអំណោយចែកជូនកុមារកំព្រា កុមារភៀសសឹក និងគ្រួសារវីរកងទ័ពជួរមុខ

(កំពង់ឆ្នាំង)៖ នាព្រឹកថ្ងៃទី២១ ខែធ្នូ ឆ្នាំ២០២៥ ថ្នាក់ដឹកនាំជាន់ខ្ពស់ខេត្តកំពង់ឆ្នាំង បានអញ្ជើញចុះជួបសំណេះសំណាល សួរសុខទុក្ខ និងនាំយកនូវគ្រឿងឧបភោគបរិភោគ ព្រមទាំងថវិកាមួយចំនួន ចែកជូនដល់កុមារកំព្រា កុមារភៀសសឹក និងគ្រួសារវីរកងទ័ពជួរមុខ ក្នុងស្មារតីយកចិត្តទុកដាក់ខ្ពស់ចំពោះសុខុមាលភាពប្រជាពលរដ្ឋ។
អញ្ជើញជាអធិបតីក្នុងសកម្មភាពមនុស្សធម៌នេះ រួមមាន៖
លោកជំទាវ កែ ច័ន្ទមុនី តំណាងរាស្ត្រមណ្ឌលកំពង់ឆ្នាំង
ឯកឧត្តម ស៊ីវ រុន ប្រធានក្រុមប្រឹក្សាខេត្ត
ឯកឧត្តម ស៊ុន សុវណ្ណារិទ្ធ អភិបាលនៃគណៈអភិបាលខេត្តកំពង់ឆ្នាំង ព្រមទាំងលោកជំទាវ
អមដំណើរដោយ អភិបាលរងខេត្ត អភិបាលស្រុក និងមន្ត្រីរាជការពាក់ព័ន្ធជាច្រើនរូបទៀត។
សកម្មភាពចុះសួរសុខទុក្ខ និងការផ្ដល់ជំនួយ
ក្នុងឱកាសនោះ ថ្នាក់ដឹកនាំបានអញ្ជើញទៅកាន់ទីតាំងសំខាន់ៗ រួមមាន៖
១. មណ្ឌលកុមារកំព្រាខេត្តកំពង់ឆ្នាំង៖ សំណេះសំណាលជាមួយកុមារកំព្រាចំនួន ១៣នាក់។
២. មណ្ឌលថែទាំកុមារអភិវឌ្ឍន៍ថ្មី៖ សួរសុខទុក្ខកុមារភៀសសឹកចំនួន ៦៥នាក់។
៣. ឃុំស្រែថ្មី ស្រុករលាប្អៀរ៖ ជួបសំណេះសំណាលជាមួយគ្រួសារវីរកងទ័ពជួរមុខ និងគ្រួសារជនភៀសសឹកចំនួន ៥៩គ្រួសារ។
ក្រៅពីការសួរសុខទុក្ខដោយផ្ទាល់ មន្ត្រីជាន់ខ្ពស់ និងថ្នាក់ដឹកនាំខេត្ត បាននាំយកនូវ៖
គ្រឿងឧបភោគបរិភោគ និងសម្ភារៈប្រើប្រាស់ចាំបាច់
ថវិកាឧបត្ថម្ភ
ការរៀបចំអាហារសាមគ្គីយ៉ាងឆ្ងាញ់ពិសា ជូនដល់កុមារៗ និងគ្រួសារទាំងអស់ក្នុងបរិយាកាសយ៉ាងស្និទ្ធស្នាល និងកក់ក្តៅបំផុត។
សកម្មភាពនេះ បានបង្ហាញឱ្យឃើញពីការយកចិត្តទុកដាក់របស់រាជរដ្ឋាភិបាល ក៏ដូចជាថ្នាក់ដឹកនាំខេត្តកំពង់ឆ្នាំង ដែលតែងតែនៅជាប់ជាមួយប្រជាពលរដ្ឋ ជាពិសេសការជួយជ្រោមជ្រែងដល់កុមារដែលងាយរងគ្រោះ និងការដឹងគុណចំពោះវីរកងទ័ពដែលបានលះបង់ដើម្បីបុព្វហេតុជាតិមាតុភូមិ៕