​🐟 ក្រសួងបរិស្ថាន និងអាជ្ញាធរខេត្តកំពង់ឆ្នាំង ចុះពិនិត្យ ដោះស្រាយ និងទប់ស្កាត់ជាបន្ទាន់ ករណីពុលត្រីតាមអូរធម្មជាតិ សង្ស័យជាប់ពាក់ព័ន្ធនឹងការដ្ឋានរុករករ៉ែ

​ដោយ អ៊ួ សុផាត÷កំពង់ឆ្នាំង៖​(ថ្ងៃទី៤ ខែធ្នូ ឆ្នាំ២០២៥) – មន្ត្រីជំនាញនៃអគ្គនាយកដ្ឋានគាំពារបរិស្ថាន ក្រសួងបរិស្ថាន បានសហការយ៉ាងយកចិត្តទុកដាក់ជាមួយអាជ្ញាធរខេត្តកំពង់ឆ្នាំង និងមន្ត្រីពាក់ព័ន្ធ ចុះប្រតិបត្តិការពិនិត្យ វាយតម្លៃ និងចាត់វិធានការទប់ស្កាត់ការបំពុលបរិស្ថានលើតំបន់ទឹកសាធារណៈ ក្រោយទទួលបានព័ត៌មានអំពីករណីត្រីងាប់ជាច្រើនក្បាលនៅក្នុងអូរធម្មជាតិក្នុងភូមិសាស្ត្រស្រុកទឹកផុស។
​ប្រតិបត្តិការនេះបានធ្វើឡើងនៅតំបន់ខ្លុងពពក ឃុំជាប និងឃុំក្តុលសែនជ័យ ស្រុកទឹកផុស ខេត្តកំពង់ឆ្នាំង។ ករណីសង្ស័យបំពុលបរិស្ថានដែលបានបង្កឱ្យត្រីងាប់នេះ បានកើតឡើងនៅតាម អូរធម្មជាតិទឹកអូរឫស្សី ដែលជាដៃអូរភ្ជាប់ទៅស្ទឹងជ្រាប ក្នុងភូមិសាស្ត្រខេត្តកំពង់ឆ្នាំង។
​ក្រុមការងារចម្រុះបានចុះទៅដល់ទីតាំងកើតហេតុ និងបានបន្តចុះពិនិត្យដល់ការដ្ឋានរបស់ ក្រុមហ៊ុន រុករករ៉ែលោហៈ Cambodian Xuan Yi Minerals Co., Ltd ដែលមានទីតាំងស្ថិតនៅក្បែរតំបន់អូរខាងលើផងដែរ ដើម្បីប្រមូលព័ត៌មាន និងវាយតម្លៃលើលទ្ធភាពនៃការជាប់ពាក់ព័ន្ធណាមួយ។
​ជាមួយគ្នានេះ ក្រុមការងារបានសហការជាមួយអាជ្ញាធរខេត្ត មន្ទីរបរិស្ថានខេត្ត សមត្ថកិច្ច និងអាជ្ញាធរពាក់ព័ន្ធ បានធ្វើការជូនដំណឹង និងផ្សព្វផ្សាយជាបន្ទាន់ដល់ប្រជាពលរដ្ឋមូលដ្ឋាន អំពីហានិភ័យនៃការបំពុលទឹកអូរឫស្សី។
​ជាវិធានការបណ្តោះអាសន្ន អាជ្ញាធរបានហាមឃាត់ មិនឱ្យប្រជាពលរដ្ឋធ្វើការប្រើប្រាស់ទឹកអូរសម្រាប់ជីវភាពប្រចាំថ្ងៃ និងហាមបរិភោគត្រីដែលចាប់បាននៅក្នុងទឹកអូរ ឬតំបន់ដែលពាក់ព័ន្ធទាំងអស់ ចាប់ពីពេលនេះតទៅ រហូតដល់មានការជូនដំណឹងជាថ្មី។ នេះគឺដើម្បីធានាសុវត្ថិភាព និងសុខភាពសាធារណៈរបស់ប្រជាពលរដ្ឋ។
​ក្រុមការងារក្រសួងបរិស្ថានបាននិងកំពុងបន្តពិនិត្យទីតាំងរុករករ៉ែលោហៈខាងលើ ព្រមទាំងបានប្រមូលសំណាកទឹក និងសំណាកពាក់ព័ន្ធផ្សេងទៀត ដើម្បីធ្វើការវិភាគនៅមន្ទីរពិសោធន៍។ ការប្រមូលសំណាក និងធ្វើកំណត់ហេតុនេះ គឺមានគោលបំណងច្បាស់លាស់ដើម្បីវាយតម្លៃអំពីផលប៉ះពាល់បរិស្ថានជាក់ស្តែង កំណត់មូលហេតុពិតប្រាកដនៃការបំពុល និងត្រីងាប់នេះ។
​ក្រោយពីទទួលបានលទ្ធផលវិភាគរួចរាល់ ក្រសួងបរិស្ថាននឹងចាត់វិធានការបន្តទៅតាមនីតិវិធីច្បាប់ស្តីពីកិច្ចការពារបរិស្ថាន និងការគ្រប់គ្រងធនធានធម្មជាតិ ដោយមិនលើកលែងឡើយ ចំពោះជនបង្កការបំពុលណាមួយ។ដោយ អ៊ួ សុផាត