🏛️ ក្រុមប្រឹក្សាខេត្តកំពង់ធំ អាណត្តិទី៤ ប្រជុំសាមញ្ញលើកទី១៩ ផ្តោតលើរបាយការណ៍ប្រចាំខែ និងកម្មវិធីវិនិយោគ ៣ឆ្នាំរំកិល

ដោយ អ៊ួងសុផា÷(កំពង់ធំ)៖ នៅព្រឹកថ្ងៃទី០៩ ខែធ្នូ ឆ្នាំ២០២៥, រដ្ឋបាលខេត្តកំពង់ធំ បានរៀបចំ កិច្ចប្រជុំសាមញ្ញលើកទី១៩ របស់ក្រុមប្រឹក្សាខេត្តកំពង់ធំ អាណត្តិទី៤ នៅសាលប្រជុំប្រាសាទតោ។ កិច្ចប្រជុំនេះ ត្រូវបានដឹកនាំដោយ ឯកឧត្តម ដៀប ពីរី ប្រធានក្រុមប្រឹក្សាខេត្ត និង ឯកឧត្តម នួន ផារ័ត្ន អភិបាលខេត្តកំពង់ធំ។
ឯកឧត្តម ដៀប ពីរី បានបញ្ជាក់ថា កិច្ចប្រជុំនេះមានគោលបំណងបង្កើនប្រសិទ្ធភាពការងារ ដោយផ្អែកលើរបៀបវារៈសំខាន់ៗដូចខាងក្រោម៖
ពិនិត្យ និងអនុម័ត សេចក្តីព្រាងកំណត់ហេតុនៃកិច្ចប្រជុំសាមញ្ញលើកទី១៨ របស់ក្រុមប្រឹក្សាខេត្ត។
ពិនិត្យ និងអនុម័ត សេចក្តីព្រាងរបាយការណ៍ប្រចាំខែវិច្ឆិកា ឆ្នាំ២០២៥ របស់រដ្ឋបាលខេត្ត។
ពិនិត្យ និងអនុម័ត សេចក្តីព្រាងស្តីពី កម្មវិធីវិនិយោគបីឆ្នាំរំកិល ២០២៦-២០២៨ របស់រដ្ឋបាលខេត្តកំពង់ធំ។
ឯកឧត្តមប្រធានក្រុមប្រឹក្សាខេត្ត បានកត់សម្គាល់ពី ការរីកចម្រើនជាបណ្ដើរៗ របស់ខេត្តកំពង់ធំ ក្រោមការដឹកនាំរបស់ឯកឧត្តម នួន ផារ័ត្ន។ ឯកឧត្តមបានលើកឡើងពី ការអភិវឌ្ឍ និងសោភ័ណភាពស្រស់ស្អាត ដែលមានការតុបតែងនៅតាមដងស្ទឹងសែន មន្ទីរអង្គភាព តាមក្រុង/ស្រុក និងទីវត្តអារាម សម្រាប់ត្រៀមស្វាគមន៍ បុណ្យចូលឆ្នាំថ្មីប្រពៃណីជាតិ ដើម្បីទាក់ទាញភ្ញៀវជាតិ-អន្តរជាតិ។
ឯកឧត្តមបានគូសបញ្ជាក់ពីកិច្ចខិតខំប្រឹងប្រែងរបស់កងកម្លាំងទាំងបី ក្នុងការរក្សា សន្តិសុខ និងសណ្ដាប់ធ្នាប់សាធារណៈ ទាំងយប់ទាំងថ្ងៃ ជូនប្រជាពលរដ្ឋ និងភ្ញៀវទេសចរ។ ជាមួយគ្នានេះ ឯកឧត្តមបានអំពាវនាវដល់សាធារណជន និងភ្ញៀវទេសចរទាំងអស់ ត្រូវចូលរួម ថែរក្សា និងទុកដាក់សំរាម ឱ្យមានសណ្ដាប់ធ្នាប់ល្អ ដើម្បីជៀសវាងប៉ះពាល់ដល់បរិស្ថាន។
ក្នុងឱកាសនោះ ឯកឧត្តម នួន ផារ័ត្ន ក៏បានលើកឡើងពី ស្ថានភាពវិវត្តថ្មីៗនៃសភាពការណ៍នៅតាមព្រំដែនកម្ពុជា-ថៃ ជាពិសេសបានថ្កោលទោសចំពោះទង្វើដ៏អាក្រក់ អមនុស្សធម៌ និងជាឧក្រិដ្ឋកម្មដ៏សាហាវឃោរឃៅ របស់ទាហានថៃ ដែលបានបើកការបាញ់ប្រហារមកលើប្រជាជនខ្មែរស្លូតត្រង់ ដោយទាមទារឱ្យមានការទទួលខុសត្រូវលើទង្វើនេះ។
ឯកឧត្តមអភិបាលខេត្តបានអំពាវនាវដល់ប្រជាពលរដ្ឋ ជឿជាក់លើការដឹកនាំរបស់ សម្តេចមហាបវរ ធិបតី ហ៊ុន ម៉ាណែត នាយករដ្ឋមន្ត្រី ក្នុងការរក្សាសន្តិភាព ការពារអធិបតេយ្យ បូរណភាពដែនដី និងសុវត្ថិភាពជូនប្រជាពលរដ្ឋ។ ឯកឧត្តមបានសង្កត់ធ្ងន់ថា សាមគ្គីជាតិ មានសារៈសំខាន់ណាស់ ក្នុងការទប់ទល់នឹងការឈ្លានពានរបស់សត្រូវពីខាងក្រៅ។ដោយ អ៊ួង សុផាត