ខេត្តកោះកុង ៖ ព្រឹកថ្ងៃទី ០៧ ខែធ្នូ ឆ្នាំ២០២៥ រដ្ឋបាលស្រុកស្រែអំបិលបានប្រារព្ធពិធីអបអរសាទរខួបអនុស្សាវរីយ៍លើកទី ៤៧ ទិវាកំណើតរណសិរ្សសាមគ្គីអភិវឌ្ឍន៍មាតុភូមិកម្ពុជា ២ ធ្នូ ១៩៧៨. ២ ធ្នូ ២០២៥ ដោយមានការអញ្ជើញចូលរួមពីឯកឧត្តម ថុង ណារ៉ុង ប្រធានក្រុមប្រឹក្សាខេត្តកោះកុង និងមានការអញ្ជើញពីឯកឧត្តម លោក ជំទាវ លោកឧកញ៉ា អ្នកឧកញ៉ា លោក ជាច័ន្ន កញ៉ា អភិបាលនៃគណៈអភិបាលស្រុកស្រែអំបិល លោក លោកស្រីអភិបាលរងស្រុក និងមន្ត្រីរាជការជុំវិញស្រុក លោកមេឃុំ លោកមេភូមិ កងកម្លាំងប្រដាប់អាវុធទាំងបី លោកគ្រូអ្នកគ្រូសិស្សានុសិស្ស ព្រមទាំងបងប្អូនប្រជាពលរដ្ឋ សរុបជាង៣០០នាក់។
នៅក្នុងពិធីនោះ ឯកឧត្តម ថុង ណារ៉ុង ប្រធានក្រុមប្រឹក្សាខេត្តកោះកុង បានឡើងអានសន្ទរកថារបស់ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា ។
សូមបញ្ជាក់់ថា ថ្ងៃ០២ ធ្នូ ឆ្នាំ១៩៧៨ ថ្ងៃទី០២ ធ្នូ ឆ្នាំ២០២៥ ជាខួបអនុស្សាវរីយ៍លើកទី៤៧ ថ្ងៃកំណើតរណសិរ្សសាមគ្គីអភិវឌ្ឍន៍មាតុភូមិកម្ពុជា ដែលមានឈ្មោះដើម រណសិរ្សសាមគ្គីសង្គ្រោះជាតិកម្ពុជា បង្កើតឡើងនៅតំបន់រំដោះភូមិជើងឃ្លូ ឃុំ២ធ្នូ ស្រុកស្នួល ខេត្តក្រចេះ បង្កើតឡើងដោយកម្លាំងមហាសាមគ្គីប្រជាជនទាំងមូលទាំងក្នុងនិងក្រៅប្រទេសដែលមានសម្ដេចអគ្គមហាពញចក្រី ហេង សំរិន សម្ដេចអគ្គមហាធម្មពោធិសាល ជា ស៊ីម សម្ដេចអគ្គមហាសេនាបតីតេជោ ហ៊ុន សែន និងវរៈជនស្នេហាជាតិជាច្រើនរូបទៀតក្នុងការរៀបចំកម្លាំងដើម្បីផ្តួលរំលំរបបប្រល័យពូជសាសន៍ប៉ុលពតខ្មែរក្រហម។
ឆ្លើយតបទៅនឹងការអំពាវនាវរបស់រណសិរ្ស ប្រជាជនគ្រប់ទិសទីបានក្រោកឈររួបរួមគ្នាជាកម្លាំងមហាសាមគ្គីជាតិនិងដោយបានទទួលការជួយឧបត្ថម្ភយ៉ាងធំធេងពីប្រទេសជាមិត្តជិតឆ្ងាយលើសកលលោក បានផ្ដួលរំលំរបបកម្ពុជាប្រជាធិបតេយ្យរហូតដល់ទទួលបានជ័យជំនះដ៏ត្រចះត្រចង់នាថ្ងៃទី០៧ ខែមករា ថ្នាំ១៩៧៩ បានបញ្ឈប់នៅសម័យកាលដ៏ខ្មៅងងឹតបំផុតដែលពុំធ្លាប់មានក្នុងប្រវត្តិសាស្ត្រកម្ពុជា និងបានបើកឡើងវិញនៅទំព័រសករាជថ្មី ប្រជាជនកម្ពុជាយើងក៏បានសិទ្ធិសេរីភាពពេញលេញនិងឱកាសដើម្បីស្ដារកសាងនិងអភិវឌ្ឍន៍មាតុភូមិរបស់ខ្លួនឡើងវិញ។បើគ្មានថ្ងៃកំណើតរណសិរ្ស ០២ ធ្នូ និងជ័យជំនះ ០៧ មករា នោះទេ ក៏គ្មានអ្វីៗដូចថ្ងៃនេះដែរ នេះគឺជាសច្ចធម៌។
នៅក្នុងពិធីនោះ ឯកឧត្តម ថុង ណារ៉ុង ឯកឧត្តម លោកជំទាវ លោកឧកញ៉ អ្នកឧកញ៉ា លោកអភិបាលស្រុកស្រែអំបិល លោកប្រធានក្រុមប្រឹក្សាស្រុកស្រែអំបិល ក៍បានជូននៅវត្ថុអនុស្សាវរីយ៍ដល់ចាស់ព្រឹទ្ធាចារ្យចំនួន ១០ រូបផងដែរ៕ដោយ គង់ វុទ្ធី
