​🐟 អាជ្ញាធរស្រុកទឹកផុស ហាមប្រជាពលរដ្ឋប្រើប្រាស់ទឹកអូរឬស្សីជាបណ្តោះអាសន្ន ក្រោយរកឃើញករណីត្រីងាប់រាប់រយ ដោយសារមានសារធាតុពុលទឹក

​ដោយ ចេង ពុំ÷ខេត្តកំពង់ឆ្នាំង ៖ រដ្ឋបាលស្រុកទឹកផុស សូមគោរពជូនដំណឹងដល់សាធារណៈជនមេត្តាជ្រាបថា៖ នៅថ្ងៃទី០៣ ខែធ្នូ ឆ្នាំ២០២៥ នេះ មានករណីត្រីងាប់ជាច្រើនក្បាលដោយសារមានសារធាតុពុលទឹកក្នុងអូរមួយកន្លែងឈ្មោះថា «អូរឬស្សី» ដែលមានទីតាំងស្ថិតនៅក្នុងភូមិតានៃ ឃុំជៀប ស្រុកទឹកផុស ខេត្តកំពង់ឆ្នាំង។
​ដើម្បីបញ្ចៀសពីការគ្រោះថ្នាក់ជាយថាហេតុណាមួយ លោក សូត្រ សង់ អភិបាលស្រុកទឹកផុស បានដឹកនាំក្រុមការងារចម្រុះចុះពិនិត្យជាក់ស្ដែងដល់កន្លែងកើតហេតុខាងលើភ្លាមៗ។
​លោកអភិបាលស្រុកបានជម្រាបជូនដំណឹង និងអំពាវនាវដល់បងប្អូនប្រជាពលរដ្ឋដែលមានទីលំនៅជាប់នៅជិតអូរ និងប្រើប្រាស់ទឹកអូរ នៅក្នុងភូមិគោលដៅដូចខាងក្រោមនេះ៖
​ឃុំជៀប ៖ ភូមិតានៃ, ភូមិស្រែរបង, ភូមិព្រៃតាំងធ្នង់, និងភូមិបឹងស្ទង។
​ឃុំខ្លុងពពក ៖ ភូមិក្រោយវត្ត, និងភូមិត្រពាំងក្របៅ។
​សូមមេត្តាផ្អាកការប្រើប្រាស់ទឹកអូរឬស្សីនេះជាបណ្តោះអាសន្ន។ ជាមួយគ្នានេះ សូមបងប្អូនប្រជាពលរដ្ឋការពារសត្វចិញ្ចឹមដូចជា គោ ក្របី ជ្រូក មាន់ ទា កុំឱ្យចូលផឹកទឹកក្នុងអូរនោះមួយរយៈពេលសិន រហូតដល់មានការជូនដំណឹងជាថ្មី។
​លោកអភិបាលស្រុកនិងក្រុមការងារបាននិងកំពុងប្រមូលយកគំរូទឹកក្នុងអូរនោះទៅពិសោធន៍ដើម្បីកំណត់អត្តសញ្ញាណសារធាតុពុលនេះឱ្យបានច្បាស់លាស់។ លទ្ធផលនៃការពិសោធន៍នឹងត្រូវជូនដំណឹងដល់សាធារណជនជាបន្ទាន់។
​លោក សូត្រ សង់ ក៏បានសម្តែងក្តីសង្ឃឹមថា បងប្អូនប្រជាពលរដ្ឋបានជ្រាបជាព័ត៌មានហើយនឹងចូលរួមសហការអនុវត្តន៍តាមការណែនាំនេះ ដើម្បីបញ្ចៀសគ្រោះថ្នាក់ដែលគំរាមកំហែងដល់អាយុជីវិតមនុស្ស និងសត្វចិញ្ចឹមផងដែរ។ដោយចេង ពុំ