(កំពង់ធំ)៖ នាថ្ងៃទី២៩ ខែឧសភា ឆ្នាំ២០២៦ គណៈប្រតិភូអន្តរក្រសួង ដឹកនាំដោយ ឯកឧត្តម ផូ ផារិទ្ធ រដ្ឋលេខាធិការ និងជាសមាជិកគណៈកម្មាធិការលទ្ធកម្ម តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមជាមួយក្រុមការងារក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ បានអញ្ជើញចុះត្រួតពិនិត្យ និងវាយតម្លៃបញ្ចប់សុពលភាព លើការងារថែទាំខួបផ្លូវចំនួន ០១ខ្សែ។
នៅក្នុងបេសកកម្មនេះដែរ ក៏មានការអមដំណើរដោយ លោក តាន់ វាសនា ប្រធានមន្ទីរអភិវឌ្ឍន៍ជនបទខេត្តកំពង់ធំ និងលោក គួង គា ប្រធានការិយាល័យផ្លូវជនបទ ព្រមទាំងមន្ត្រីបច្ចេកទេសពាក់ព័ន្ធជាច្រើនរូប។
លក្ខណៈបច្ចេកទេសនៃគម្រោង
ផ្លូវជនបទដែលបានចុះត្រួតពិនិត្យ និងវាយតម្លៃបញ្ចប់សុពលភាពនាឱកាសនេះ រួមមាន៖
ប្រភេទការងារ៖ ការងារថែទាំខួបផ្លូវចំនួន ០១ខ្សែ ដោយក្រាលដីល្បាយក្រួស
ទំហំ និងប្រវែង៖ ប្រវែង ១០.០០០ម៉ែត្រ (១០គីឡូម៉ែត្រ) ទទឹង ៥ម៉ែត្រ និងកម្រាស់ ២០សង់ទីម៉ែត្រ
សំណង់សិល្បការ្យ៖ សាងសង់លូមូលមុខមួយ ចំនួន ០២កន្លែង
ទីតាំងគម្រោង៖ ស្ថិតនៅក្នុងឃុំកកោះ និងឃុំទីពោ ស្រុកសន្ទុក ខេត្តកំពង់ធំ
លេខកូដគម្រោង៖ DRR-PM-2025-No-012 អនុវត្តដោយមន្ទីរអភិវឌ្ឍន៍ជនបទខេត្តកំពង់ធំ និងប្រើប្រាស់ថវិកាជំពូក៦១។
ការនាំមកនូវប្រសាសន៍ផ្តាំផ្ញើសួរសុខទុក្ខ
នៅក្នុងពិធីចុះពិនិត្យផ្លូវនេះដែរ ឯកឧត្តម ផូ ផារិទ្ធ បានពាំនាំនូវប្រសាសន៍ផ្ដាំផ្ញើសួរសុខទុក្ខ សេចក្តីស្រឡាញ់ និងពរសព្វសាធុការយ៉ាងជ្រាលជ្រៅពីសំណាក់៖
សម្តេចតេជោ ហ៊ុន សែន មគ្គុទេសក៍ឯកនយោបាយឈ្នះ-ឈ្នះ បិតាស្ថាបនិកសន្តិភាព និងជាប្រធានព្រឹទ្ធសភា
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត
ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ
ជូនចំពោះបងប្អូនប្រជាពលរដ្ឋទាំងអស់ ដែលរស់នៅក្នុងមូលដ្ឋានខាងលើ ដោយក្តីនឹករលឹកបំផុត។
ការប្ដេជ្ញាចិត្តរបស់រាជរដ្ឋាភិបាល និងការអំពាវនាវ
ក្នុងឱកាសជួបសំណេះសំណាលនោះដែរ ឯកឧត្តមរដ្ឋលេខាធិការ បានជម្រាបជូនប្រជាពលរដ្ឋអំពីការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការថែរក្សាសុខសន្ដិភាពឱ្យបានគង់វង្ស និងការជំរុញអភិវឌ្ឍប្រទេសជាតិឱ្យមានការរីកចម្រើនយ៉ាងគំហុក។ ជាក់ស្តែង ការកសាងហេដ្ឋារចនាសម្ព័ន្ធផ្លូវជនបទនាពេលនេះ គឺជាការយកចិត្តទុកដាក់ខ្ពស់លើកកម្ពស់គុណភាពជីវិត របស់ប្រជាជននៅតំបន់ជនបទ និងជាចំណងដៃដ៏ថ្លៃថ្លាជូនដល់បងប្អូនប្រជាពលរដ្ឋក្នុងការធ្វើដំណើរ។
«ផ្លូវក្រាលក្រួសក្រហម ១ខ្សែនេះ មានសារៈប្រយោជន៍ណាស់សម្រាប់ពុកម៉ែបងប្អូន ក្នុងការប្រើប្រាស់ដឹកជញ្ជូនកសិផលទៅកាន់ទីផ្សារ និងសម្រួលដល់សិស្សានុសិស្សធ្វើដំណើរទៅសាលារៀនបានប្រកបដោយសុវត្ថិភាព ងាយស្រួល និងឆាប់រហ័សជាងមុន»។ — ប្រសាសន៍ឯកឧត្តម ផូ ផារិទ្ធ
ជាចុងក្រោយ ឯកឧត្តមរដ្ឋលេខាធិការ ក៏បានអំពាវនាវដល់ប្រជាពលរដ្ឋទាំងអស់ដែលរស់នៅក្នុងមូលដ្ឋាន និងអ្នកប្រើប្រាស់ផ្លូវនេះ មេត្តាចូលរួមថែរក្សាអនាម័យ ប្រុងប្រយ័ត្នពេលធ្វើដំណើរ និងរួមគ្នាថែទាំផ្លូវសាធារណៈនេះឱ្យបានល្អ ដើម្បីធានាបាននូវការប្រើប្រាស់ជាប់គង់វង្សយូរអង្វែង តទៅអនាគត៕
