លោក ទុយ សុធារិទ្ធ ដឹកនាំកិច្ចប្រជុំកែសម្រួលសមាសភាព និងចាត់តាំងក្រុមការងារគណបក្សប្រជាជនកម្ពុជា ចុះជួយមូលដ្ឋានឃុំទួលគ្រើល

(កំពង់ធំ)៖ នារសៀលថ្ងៃទី២០ ខែមិថុនា ឆ្នាំ២០២៦ លោក ទុយ សុធារិទ្ធ អនុប្រធានក្រុមការងារចុះជួយមូលដ្ឋានស្រុកប្រាសាទបល្ល័ង្ក និងជាអនុប្រធានក្រុមការងារចុះជួយមូលដ្ឋានឃុំទួលគ្រើល បានអញ្ជើញដឹកនាំកិច្ចប្រជុំស្ដីពីការកែសម្រួលសមាសភាពក្រុមការងារគណបក្សប្រជាជនកម្ពុជា និងចាត់តាំងក្រុមការងារចុះមូលដ្ឋានភូមិម្រាក(ក) ឃុំទួលគ្រើល ស្រុកប្រាសាទបល្ល័ង្ក ខេត្តកំពង់ធំ។
កិច្ចប្រជុំនេះមានការអញ្ជើញចូលរួមពី៖
លោកស្រី ស៉ិន ស៉ីផាន សមាជិកក្រុមការងារគណបក្សចុះជួយស្រុកប្រាសាទបល្ល័ង្ក អនុប្រធានក្រុមការងារចុះជួយឃុំទួលគ្រើល និងជាប្រធានក្រុមការងារចុះមូលដ្ឋានភូមិម្រាក(ក)។
លោកស្រី ង៉ែត ណារីន សមាជិកក្រុមការងារគណបក្សចុះជួយស្រុកប្រាសាទបល្ល័ង្ក អនុប្រធានក្រុមការងារចុះជួយឃុំទួលគ្រើល និងជាប្រធានក្រុមការងារចុះមូលដ្ឋានភូមិជន្លូស។
ព្រមទាំងលោក លោកស្រី ប្រធាន អនុប្រធាន និងសមាជិក សមាជិកា សរុបចំនួន ១០១នាក់។
ការពង្រឹងតួនាទីភារកិច្ច និងការគ្រប់គ្រងសមាជិកបក្ស
ឆ្លៀតក្នុងឱកាសនោះ លោក ទុយ សុធារិទ្ធ បានលើកឡើងថា ក្រុមការងារគណបក្សប្រជាជនកម្ពុជាចុះមូលដ្ឋានភូមិក្នុងឃុំ ត្រូវបំពេញភារកិច្ចជាសេនាធិការឱ្យប្រធានក្រុមការងារគណបក្សចុះមូលដ្ឋានឃុំទួលគ្រើល។ ប្រធានក្រុមការងារដឹកនាំរួម ត្រូវធ្វើការប្រជុំពិភាក្សា ផ្តល់យោបល់ និងគាំទ្រដល់ក្រុមការងារចុះមូលដ្ឋានភូមិ ដើម្បីសម្រេចជោគជ័យ និងទទួលបានការគាំទ្រពីប្រជាពលរដ្ឋ។
លោកបានសង្កត់ធ្ងន់លើចំណុចគន្លឹះរួមមាន៖
ពង្រឹងសមាជិកបក្ស៖ គ្រប់គ្រង ពង្រឹង និងពង្រីកការកសាងសមាជិកគណបក្សឱ្យបានគ្រប់ផែនការ (លើសពី ៦៨%) និងមានទិន្នន័យគ្រប់គ្រងច្បាស់លាស់។
បែងចែកការងារ៖ ត្រូវមានការប្រជុំពិភាក្សា បែងចែកភារកិច្ចសមាជិកក្រុមការងារឱ្យទទួលខុសត្រូវ និងចាត់តាំងការដឹកនាំចុះតាមខ្នងផ្ទះនីមួយៗឱ្យបានច្បាស់លាស់ ផ្អែកលើសមត្ថភាព និងលទ្ធភាពរបស់មន្ត្រីគណបក្ស។
ការក្តាប់សភាពការណ៍ និងដោះស្រាយបញ្ហាជូនប្រជាពលរដ្ឋ
នៅក្នុងពិធីសំណេះសំណាល លោកអនុប្រធានក្រុមការងារ បានបញ្ជាក់បន្ថែមថា ប្រធានក្រុមការងារគណបក្សចុះមូលដ្ឋានឃុំ និងភូមិនីមួយៗ ត្រូវប្រជុំជីវភាពប្រចាំខែ និងប្រជុំតាមការចាំបាច់ ដើម្បីត្រួតពិនិត្យ ពិភាក្សា បូកសរុបវឌ្ឍនភាពការងារ ព្រមទាំងដាក់ចេញផែនការទិសដៅបន្ត ដើម្បីដោះស្រាយបញ្ហាប្រឈម និងសំណូមពរនានារបស់ប្រជាពលរដ្ឋ។
”ត្រូវក្តាប់ឱ្យបាននូវសំណូមពរ និងសតិអារម្មណ៍ ដើម្បីវិភាគចំណុចខ្លាំង ចំណុចខ្សោយ បញ្ហាប្រឈម និងកាលានុវត្តភាពរបស់គណបក្ស សំដៅកសាងយន្តការដោះស្រាយសមស្រប ក្នុងការអនុវត្តឱ្យបានជោគជ័យនូវកម្មវិធីនយោបាយរបស់គណបក្សប្រជាជនកម្ពុជា។”
ទន្ទឹមនឹងនេះ ក្រុមការងារគ្រប់ថ្នាក់ត្រូវខិតខំស្រាវជ្រាវសភាពការណ៍ និងសតិអារម្មណ៍ក្នុងស្រទាប់យុវជន ស្ត្រី កម្មករ និយោជិក និងគ្រប់មជ្ឈដ្ឋានមហាជន ព្រមទាំងតាមដាន វាយតម្លៃការធ្វើអំពើល្អរបស់មន្ត្រីគណបក្ស ដើម្បីកែលម្អឱ្យបានទាន់ពេលវេលា។
ទិសដៅការងារ និងការត្រៀមលក្ខណៈបោះឆ្នោត
ជាចុងក្រោយ លោក ទុយ សុធារិទ្ធ បានរំលឹកដល់ក្រុមការងារ ត្រូវធ្វើការតាមដាន ឈ្វេងយល់ និងវិភាគសភាពការណ៍នយោបាយរបស់ពួកអមិត្ត ដើម្បីរៀបចំវិធានការទប់ស្កាត់ និងវាយបកទាន់ពេលវេលា។ ត្រូវសហការ គៀងគរប្រភពធនធានស្របច្បាប់នានា ដើម្បីធានាលើការងារបក្ស និងការកសាងសមិទ្ធិផលថ្មីៗ ព្រមទាំងមានសិទ្ធិចាត់ចែង និងចាត់តាំងមន្ត្រីក្រោមឱវាទបន្ថែមចុះមូលដ្ឋានតាមការចាំបាច់។
ជាពិសេស លោកបានអំពាវនាវដល់បងប្អូនប្រជាពលរដ្ឋ ដែលមានអត្តសញ្ញាណប័ណ្ណផុតសុពលភាព ខុសអក្ខរាវិរុទ្ធ ឬបាត់បង់ សូមអញ្ជើញទៅធ្វើអត្តសញ្ញាណប័ណ្ណសញ្ជាតិខ្មែរជាបន្ទាន់ ដើម្បីត្រៀមលក្ខណៈចូលរួមក្នុងការបោះឆ្នោតជ្រើសរើសក្រុមប្រឹក្សាឃុំ/សង្កាត់ នាពេលខាងមុខនេះ៕