ពលរដ្ឋបារម្ភបាក់ទំនប់និងខូចបឹងធម្មជាតិ ស្នើឱ្យអាជ្ញាធរខេត្តកំពង់ឆ្នាំងជួយអន្តរាគមន៍រឿងការដ្ឋានបូមខ្សាច់

​ខេត្តកំពង់ឆ្នាំង ៖ ប្រជាពលរដ្ឋនៅក្នុងសហគមន៍ក្រឡឹងមាស បានលើកគ្នាតវ៉ាស្នើសុំឱ្យម្ចាស់ការដ្ឋានបូមខ្សាច់មួយកន្លែង ដែលកំពុងធ្វើសកម្មភាពនៅក្នុងបឹងសហគមន៍ ស្ថិតក្នុងភូមិធ្លកយល់ ឃុំតាជេស ស្រុកកំពង់ត្រឡាច ខេត្តកំពង់ឆ្នាំង ធ្វើការដកគ្រឿងចក្រចេញពីទីតាំងនេះជាបន្ទាន់។
​ភាគីប្រជាពលរដ្ឋ និងប្រធានសហគមន៍៖ បារម្ភពីផលប៉ះពាល់បរិស្ថាន និងប្រភពទឹកប្រើប្រាស់
​ប្រជាពលរដ្ឋ ក៏ដូចជាប្រធានសហគមន៍ បានលើកឡើងនៅរសៀលថ្ងៃទី០២ ខែមិថុនា ឆ្នាំ២០២៦ នេះថា មូលហេតុដែលពួកគាត់ស្នើឱ្យដកគ្រឿងចក្រចេញ គឺដោយសារភាគីក្រុមហ៊ុនមិនបានធ្វើការទំនាក់ទំនង ឬសហការជាមួយខាងសហគមន៍នោះឡើយ ហេតុនេះក្នុងនាមប្រធានសហគមន៍គឺមិនទទួលស្គាល់សកម្មភាពនេះទេ។
​តំណាងពលរដ្ឋបានបញ្ជាក់ថា ប្រសិនបើក្រុមហ៊ុនចង់ធ្វើអាជីវកម្មនៅទីនេះ សូមស្នើឱ្យអាជ្ញាធរពាក់ព័ន្ធចុះមកវែកញែកឱ្យច្បាស់លាស់ពីភូមិសាស្ត្រ និងធារាសាស្ត្រ៖
​ត្រូវកំណត់ឱ្យច្បាស់ថា ទំនប់មេទឹកមានចំណុះប៉ុណ្ណា និងបែងចែកប្លង់ដីឱ្យបានដាច់ស្រឡះ។
​ត្រូវទទួលយកសំណើរបស់សហគមន៍ ដើម្បីចូលរួមអភិវឌ្ឍ និងបញ្ចៀសផលប៉ះពាល់។
​តម្រូវឱ្យក្រុមហ៊ុនកាយយកដីស្អុយចេញពីបឹង កុំកាយយកតែខ្សាច់ និងត្រូវកាយឱ្យឆ្ងាយពីតំបន់ទ្វារទឹក ដើម្បីការពារកុំឱ្យបាក់ទំនប់។
​ត្រូវជួសជុលផ្លូវជុំវិញខ្នងទំនប់ និងហាមកាប់បំផ្លាញព្រៃលិចទឹកដែលនៅសេសសល់ក្បែរទ្វារទឹក ដើម្បីរក្សាជម្រកសត្វព្រៃ និងកន្លែងត្រីពងកូន។
​«កន្លងមក ក្រុមហ៊ុនបានកាយយកតែខ្សាច់ប៉ុណ្ណោះ មិនមែនជាការស្តារបឹងឡើយ ជាក់ស្តែងវាបានបន្សល់ទុកនូវរណ្តៅក្រហីងក្រហូង និងខូចខាតដីបឹងអស់។ សកម្មភាពនេះ គឺធ្វើឡើងដើម្បីផលប្រយោជន៍បុគ្គលតែប៉ុណ្ណោះ ទើបប្រជាពលរដ្ឋស្នើឱ្យក្រុមហ៊ុនដកចេញតែម្តង»។ នេះជាការបញ្ជាក់បន្ថែមពីពលរដ្ឋ។
​ភាគីអាជ្ញាធរជំនាញ៖ ក្រុមហ៊ុនមានអាជ្ញាប័ណ្ណត្រឹមត្រូវ
​ជុំវិញករណីនេះ លោក យ៉ង់ ភារម្យ អភិបាលរងខេត្តទទួលបន្ទុក និងលោក អេង ថេង ប្រធានការិយាល័យធនធានរ៉ែ និងថាមពលខេត្តកំពង់ឆ្នាំង បានអះអាងថា ទីតាំងអាជីវកម្មខ្សាច់ខាងលើ គឺជារបស់លោក ហ៊ុន ចំរើន ដែលមានអាជ្ញាប័ណ្ណសិប្បកម្មធនធានរ៉ែ សម្រាប់ជីកយកខ្សាច់ (ខ្សាច់បក) ដោយមានច្បាប់អនុញ្ញាតត្រឹមត្រូវពីស្ថាប័នជំនាញ។
​ភាគីម្ចាស់អាជីវកម្ម៖ ធានាថាធ្វើតាមបច្ចេកទេស និងធ្លាប់បានប្រជុំជាមួយពលរដ្ឋ
​លោក ហ៊ុន ចំរើន ម្ចាស់អាជីវកម្មបូមខ្សាច់ បានបញ្ជាក់តាមទូរស័ព្ទថា អាជីវកម្មរបស់លោកបានឆ្លងកាត់ការស្នើសុំ ការចុះកំណត់ទីតាំង និងការសិក្សាវាយតម្លៃផលប៉ះពាល់ពីមន្ទីរបរិស្ថាន និងមន្ទីរធនធានទឹក ព្រមទាំងមានច្បាប់អនុញ្ញាតពីមន្ទីរធនធានរ៉ែ និងបានបង់សួយសារជូនរដ្ឋត្រឹមត្រូវ។
​លោកបានបន្តថា ក្រុមហ៊ុនបានអនុវត្តយ៉ាងខ្ជាប់ខ្ជួនតាមគំនូសប្លង់បច្ចេកទេស ដែលមានចែងក្នុងអាជ្ញាប័ណ្ណទំហំ ១ហិកតា ដោយមិនឱ្យខុសនោះឡើយ។ មុននឹងចុះអនុវត្តការងារ លោកក៏បានសហការជាមួយអាជ្ញាធរមូលដ្ឋាន និងប្រជាពលរដ្ឋនៅក្នុងសហគមន៍ចំណុះទាំង ៣ភូមិ (ភូមិស្នាយ, ភូមិធ្លកយល់, និងភូមិស្វាយបាកាវ) ដើម្បីប្រជុំទទួលយកសំណូមពរ និងដោះស្រាយបញ្ហាប្រឈមជាច្រើនលើក រហូតទទួលបានការឯកភាពក្នុងការជួសជុលផ្លូវជូនប្រជាពលរដ្ឋប្រើប្រាស់រួចរាល់ហើយដែរ។
​សំណូមពរចុងក្រោយពីប្រជាពលរដ្ឋ
​ទោះជាមានការបកស្រាយហេតុផលផ្សេងគ្នាយ៉ាងណាក៏ដោយ ប្រជាពលរដ្ឋ និងប្រធានសហគមន៍ នៅតែទទូចស្នើសុំដល់អាជ្ញាធរពាក់ព័ន្ធថ្នាក់ខេត្ត មេត្តាចុះពិនិត្យទិដ្ឋភាពជាក់ស្តែង សិក្សាវាយតម្លៃឡើងវិញពីផលប៉ះពាល់ ដើម្បីស្វែងរកដំណោះស្រាយសមស្របណាមួយដោយក្តីអនុគ្រោះ។
​ប្រជាពលរដ្ឋបានសម្តែងការព្រួយបារម្ភថា បឹងសហគមន៍ក្រឡឹងមាសនេះ គឺជាប្រភពទឹកដ៏សំខាន់ដែលពួកគាត់អាស្រ័យផលជារៀងរាល់ឆ្នាំ។ ប្រសិនបើគ្មានការអន្តរាគមន៍ដោះស្រាយពីថ្នាក់លើទេនោះ បឹងធម្មជាតិមួយនេះនឹងត្រូវបំផ្លិចបំផ្លាញ និងក្លាយទៅជារណ្តៅជ្រៅបង្កគ្រោះថ្នាក់ជាមិនខាន៕
​