​ពលរដ្ឋរិះគន់! សំណង់រឹង២ទីតាំងសង់រំលោភចំណីទន្លេយ៉ាងរលូននៅស្រុកកំពង់ត្រឡាច ខណៈមេភូមិសារភាពថា «ជួនកាលបិទភ្នែកបិទច្រមុះ» ​

​
​ខេត្តកំពង់ឆ្នាំង ៖ ប្រជាពលរដ្ឋកំពុងសម្តែងការមិនពេញចិត្ត និងដាក់ការសង្ស័យយ៉ាងខ្លាំង ចំពោះចំណាត់ការរបស់អាជ្ញាធរមូលដ្ឋាន ក្រោយពីឃើញមានសំណង់រឹងចំនួន ២ទីតាំង កំពុងសម្រុកសាងសង់រំលោភចូលដីចំណីទន្លេយ៉ាងរលូន ដោយគ្មានការទប់ស្កាត់ ឬអនុវត្តវិធានការរដ្ឋបាលណាមួយឡើយ។
​តាមប្រភពព័ត៌មានបានឱ្យដឹងថា សំណង់ខុសច្បាប់ទាំង ២ទីតាំងនោះរួមមាន៖
​ទីតាំងទី១៖ ស្ថិតក្នុងភូមិតាជេស ឃុំតាជេស ស្រុកកំពង់ត្រឡាច។
​ទីតាំងទី២៖ ស្ថិតក្នុងភូមិព្រែកគន្លង ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង។
​ប្រជាពលរដ្ឋបានលើកឡើងថា សំណង់បេតុងធំៗបែបនេះ មិនអាចលួចសាងសង់ក្នុងរយៈពេលខ្លីដោយគ្មានអ្នកដឹងឡើយ។ ការឱ្យមានការសាងសង់យ៉ាងរលូនបែបនេះ បានបង្កជាសំណួរយ៉ាងធំចំពោះប្រសិទ្ធភាព ភាពស្អាតស្អំ និងការអនុវត្តច្បាប់របស់អាជ្ញាធរនៅមូលដ្ឋាន។
​ជុំវិញករណីនេះ លោក ថៃ ហ៊ី មេភភូមិតាជេស បានបំភ្លឺថា ដោយសាររយៈពេល ៦ខែនេះ លោកមានជំងឺ ទើបចាត់ចែងឱ្យលោកអនុភូមិទទួលបន្ទុកការងារបណ្តោះអាសន្ន។ ទោះជាយ៉ាងណា លោកបានអះអាងថា សំណង់រឹងដែលកំពុងសាងសង់នោះជារបស់ជនជាតិវៀតណាម ហើយការធ្វើលើដីចំណីទន្លេគឺគ្មានច្បាប់ទម្លាប់ណាមួយអនុញ្ញាតឡើយ ប៉ុន្តែលោកបានសារភាពថា៖ «ពេលខ្លះចេះតែបិទភ្នែកបិទច្រមុះទៅ»។
​ដោយឡែក លោកស្រី ស្វាយ ស៊ីម មេឃុំតាជេស បានប្រាប់ឱ្យដឹងដែរថា អាជ្ញាធរឃុំពុំមានសមត្ថកិច្ចចេញច្បាប់អនុញ្ញាតសាងសង់ឱ្យនោះទេ គឺមានតែតាមរយៈយន្តការច្រកចេញចូលតែមួយរបស់រដ្ឋបាលស្រុក ទើបមានសិទ្ធិសម្រេច។
​ពាក់ព័ន្ធនឹងការរិះគន់នេះ លោក ព្រុំ ប៊ុនធឿន អភិបាលរងស្រុកកំពង់ត្រឡាច ទទួលបន្ទុកវិស័យសំណង់ស៊ីវិល បានបញ្ជាក់ថា លោកនឹងយករឿងនេះរាយការណ៍ជូនអភិបាលស្រុក ដើម្បីរៀបចំកម្លាំងគណៈបញ្ជាការឯកភាពស្រុកចុះពិនិត្យផ្ទាល់។
​ទោះជាយ៉ាងនេះក្តី ប្រជាពលរដ្ឋនៅតែទទូច និងសំណូមពរយ៉ាងទទូចដល់ ឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង និងជាប្រធានគណៈកម្មការគ្រប់គ្រងដីរដ្ឋថ្នាក់ខេត្ត មេត្តាចាត់ក្រុមការងារជំនាញចុះពិនិត្យ សិក្សាផ្លូវច្បាប់ និងផលប៉ះពាល់ជាបន្ទាន់។ ជាពិសេស សុំឱ្យមានការធ្វើអធិការកិច្ចចំពោះមន្ត្រីថ្នាក់ក្រោមណា ដែលមានការឃុបឃិតបំផ្លាញដីរដ្ឋ (មន្ត្រីកន្ទេលធំបន្លំដេក) ដើម្បីអនុវត្តវិធានការច្បាប់ និងរដ្ឋបាលឱ្យបានតឹងរឹងបំផុត។
​ការសាងសង់សំណង់បេតុង ផ្ទះ ឬអគារនានារំលោភលើដីចំណីទន្លេ ដែលជាទ្រព្យសម្បត្តិសាធារណៈរបស់រដ្ឋ គឺខុសច្បាប់ជាធរមាន និងបង្កផលប៉ះពាល់ធ្ងន់ធ្ងរដូចជា៖
​បង្កការបំពុលទឹក និងបាត់បង់សោភ័ណភាពធម្មជាតិ។
​ផ្លាស់ប្តូរចរន្តទឹក បង្កហានិភ័យបាក់ច្រាំងទន្លេ។
​ធ្វើឱ្យរួមតូចចរន្តទឹកហូរ បង្កជាគ្រោះទឹកជំនន់នៅរដូវវស្សា។
​បង្កការលំបាកដល់ការធ្វើដំណើរ និងការសង្គ្រោះតាមផ្លូវទឹក។
​យោងតាមច្បាប់ ដីចំណីទន្លេជាដីសាធារណៈរបស់រដ្ឋ មិនអាចទិញ-លក់បានឡើយ ហើយអាជ្ញាធរក៏គ្មានសិទ្ធិចេញលិខិតអនុញ្ញាតសាងសង់ដែរ។ រដ្ឋមានសិទ្ធិបង្គាប់ឱ្យរុះរើដោយគ្មានសំណង ហើយអ្នករំលោភបំពានត្រូវប្រឈមមុខនឹងការផាកពិន័យ ឬទោសពន្ធនាគារ។
​ជាចុងក្រោយ ប្រជាពលរដ្ឋបានសំណូមពរដល់ លោកអភិបាលស្រុកកំពង់ត្រឡាច មេត្តាឧស្សាហ៍ចុះមកត្រួតពិនិត្យតាមជួរដងទន្លេឱ្យបានញឹកញាប់ ដើម្បីទប់ស្កាត់បទល្មើសទាំងនេះទាន់ពេលវេលា៕
​