លោក ជុំ សុភមករា អ្នកនាំពាក្យអាជ្ញាធរជាតិអប្សរា ទទួលមរណភាពក្នុងគ្រោះថ្នាក់ចរាចរណ៍ដ៏រន្ធត់ នៅខេត្តកំពង់ធំ

​(កំពង់ធំ)៖ មានការភ្ញាក់ផ្អើល និងសម្តែងការសោកស្តាយជាខ្លាំង ពីសំណាក់មហាជន ក៏ដូចជាមន្ត្រីរាជការ បន្ទាប់ពីលោក ជុំ សុភមករា មន្ត្រីអ្នកនាំពាក្យនៃអាជ្ញាធរជាតិអប្សរា បានទទួលមរណភាពយ៉ាងអាណោចអាធ័ម ក្នុងគ្រោះថ្នាក់ចរាចរណ៍ដ៏រន្ធត់មួយ កាលពីព្រឹកថ្ងៃទី០១ ខែមិថុនា ឆ្នាំ២០២៦ នេះ នៅលើផ្លូវជាតិលេខ៦ ស្ថិតក្នុងភូមិព្រៃប្រស់ ឃុំត្បែង ស្រុកកំពង់ស្វាយ ខេត្តកំពង់ធំ។

​យោងតាមប្រភពព័ត៌មានពីកន្លែងកើតហេតុ បានឱ្យដឹងថា៖
​មុនពេលកើតហេតុ៖ គេបានឃើញរថយន្តមួយគ្រឿងម៉ាក Hyundai បើកបរក្នុងទិសដៅពីលិចទៅកើត (ពីខេត្តសៀមរាប ឆ្ពោះទៅរាជធានីភ្នំពេញ)។
​លុះធ្វើដំណើរមកដល់ចំណុចកើតហេតុខាងលើ រថយន្តម៉ាក Hyundai នោះ ក៏បានរ៉េចង្កូតទៅខាងឆ្វេងដៃ ជ្រុលទៅបុកជាមួយរថយន្តមួយគ្រឿងទៀតម៉ាក Ford Ranger ដែលកំពុងបើកបរក្នុងទិសដៅផ្ទុយគ្នា (ពីភ្នំពេញ ឆ្ពោះទៅសៀមរាប) យ៉ាងពេញទំហឹងតែម្តង។
​ គ្រោះថ្នាក់ដ៏ធ្ងន់ធ្ងរនេះ បានបណ្តាលឱ្យលោក ជុំ សុភមករា ទទួលមរណភាពភ្លាមៗនៅនឹងកន្លែងកើតហេតុ ចំណែកឯស្ថានភាពអ្នករួមដំណើរផ្សេងទៀត និងការខូចខាតរថយន្តទាំងពីរគ្រឿង នឹងមានការធ្វើបច្ចុប្បន្នភាពបន្ថែមពីសមត្ថកិច្ចជំនាញ៕