🛑 សមត្ថកិច្ចបិទសិប្បកម្មកែច្នៃលៀសខុសច្បាប់មួយកន្លែងនៅកំពង់ឆ្នាំង ក្រោយរកឃើញគ្មានច្បាប់អនុញ្ញាតពីក្រសួងកសិកម្ម

កំពង់ឆ្នាំង ៖ នៅថ្ងៃទី៥ ខែធ្នូ ឆ្នាំ ២០២៥ សិប្បកម្មកែច្នៃលៀសមួយកន្លែង ដែលមានទីតាំងនៅភូមិព្រៃលាក់នាង ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ត្រូវបានសមត្ថកិច្ចចម្រុះចុះបិទផ្អាកមិនឲ្យដំណើរការជាបណ្ដោះអាសន្ន ដោយសារតែទីតាំងនេះគ្មានច្បាប់អនុញ្ញាតពីក្រសួងកសិកម្ម រុក្ខាប្រមាញ់ និងនេសាទត្រឹមត្រូវ។
កិច្ចប្រតិបត្តិការបង្ក្រាបនេះដឹកនាំផ្ទាល់ដោយ លោកស្រី ស្រ៊ីម ស៊ាងភាជ ព្រះរាជអាជ្ញារង អមសាលាដំបូងខេត្តកំពង់ឆ្នាំង ដោយមានការចូលរួមពី៖
អធិការដ្ឋានខាងត្បូងបឹងទន្លេសាប
ខណ្ឌរដ្ឋបាលជលផលកំពង់ឆ្នាំង
នគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត
កម្លាំងអធិការដ្ឋាននគរបាលស្រុករលាប្អៀរ
សរុបកម្លាំងចូលរួមមានចំនួន ១៩នាក់។
តាមការបញ្ជាក់ពីមន្ត្រីខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានឲ្យដឹងថា ទីតាំងសហគ្រាសខាងលើមានឈ្មោះពេញថា៖
«ជេវ៉ាង អេហ្គ្រីខលឆីរ័ល អេនសាយឡាយ ប្រដាក់ ប្រូសេស៊ីង ឯ.ក»
សហគ្រាសនេះបានបើកការកែច្នៃលៀសដោយខុសច្បាប់ ហើយមានអ្នកគ្រប់គ្រងជាជនជាតិចិនឈ្មោះ Wang Liangcao។
បន្ទាប់ពីត្រួតពិនិត្យជាក់ស្ដែង សមត្ថកិច្ចបានរកឃើញថា សហគ្រាសនេះមានលិខិតអនុញ្ញាតមួយចំនួនដូចជា៖
លិខិតអនុញ្ញាតពីក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ (លេខ 826 ឧវបន សកម ប្រ,ក)
ឯកសារពាក់ព័ន្ធមួយចំនួនទៀតរបស់ក្រសួងពាណិជ្ជកម្ម និងអគ្គនាយកដ្ឋានពន្ធដារ
ប៉ុន្តែ សហគ្រាសនេះ មិនមានលិខិតអនុញ្ញាត ពីក្រសួងកសិកម្ម រុក្ខាប្រមាញ់ និងនេសាទ សម្រាប់ការកែច្នៃផលផលិតផលជលផលឡើយ។
ដោយឃើញថា សំណុំឯកសារនៅមិនទាន់មានលក្ខណៈគ្រប់គ្រាន់ស្របច្បាប់សម្រាប់ដំណើរការកែច្នៃផលផលិតផលជលផល ទើបកម្លាំងសមត្ថកិច្ចសម្រេច បិទបញ្ឈប់សកម្មភាព របស់សហគ្រាសនេះជាបន្ទាន់។ ជាមួយគ្នានេះ សមត្ថកិច្ចក៏បានណែនាំឲ្យម្ចាស់សហគ្រាសធ្វើលិខិតស្នើសុំអនុញ្ញាតពីក្រសួងកសិកម្ម រុក្ខាប្រមាញ់ និងនេសាទឲ្យបានត្រឹមត្រូវ ដើម្បីទទួលបានសិទ្ធិដំណើរការស្របច្បាប់ឡើងវិញ។