: កម្លាំងចម្រុះខេត្តបន្ទាយមានជ័យ ចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា ៣កន្លែង ដកហូតសម្ភារៈ និងឃាត់មនុស្ស ១៤៥នាក់

​
​(បន្ទាយមានជ័យ)៖ កម្លាំងចម្រុះដឹកនាំដោយ លោក មុត សម្បត្តិ ព្រះរាជអាជ្ញារងអមសាលាដំបូងខេត្តបន្ទាយមានជ័យ បានចុះបង្ក្រាបទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Scam Online) ទ្រង់ទ្រាយធំចំនួន ៣កន្លែងផ្សេងគ្នាក្នុងក្រុងប៉ោយប៉ែត ដោយបានរកឃើញ និងឃាត់ខ្លួនជនសង្ស័យសរុប ១៤៥នាក់ (រួមមានជនជាតិខ្មែរ និងបរទេស) ព្រមទាំងដកហូតសម្ភារប្រព្រឹត្តបទល្មើសជាច្រើនគ្រឿង។
​ប្រតិបត្តិការនេះបានធ្វើឡើងកាលពីថ្ងៃទី១៣ ខែសីហា ឆ្នាំ២០២៦ ក្រោមការបញ្ជាផ្ទាល់ពី លោក អ៊ុ រាត្រី អភិបាលខេត្តបន្ទាយមានជ័យ និងមានការសម្របសម្រួលពី លោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត។
​លទ្ធផលនៃការចុះឆែកឆេរទីតាំងទាំង ៣កន្លែង៖
​ទីតាំងទី១ (ផ្ទះវីឡា ២ខ្នងជាប់គ្នា): ស្ថិតនៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត។ ក្រុមការងារមិនបានរកឃើញជនសង្ស័យ ឬសម្ភារប្រព្រឹត្តបទល្មើសឡើយ ដោយបានធ្វើការអប់រំម្ចាស់ទីតាំង និងអនុញ្ញាតឱ្យរស់នៅជាធម្មតា។
​ទីតាំងទី២ (ផ្ទះជួល ២ល្វែង កម្ពស់ ៣ជាន់): ស្ថិតនៅភូមិផ្សារកណ្តាល សង្កាត់ផ្សារកណ្តាល។ សមត្ថកិច្ចបានរកឃើញជនជាតិខ្មែរ ២នាក់ (ប្រុស) ដែលមានតម្រុយប្រព្រឹត្តបទល្មើសឆបោក។ វត្ថុតាងដកហូតបានរួមមាន៖ ទូរស័ព្ទដៃ ៥គ្រឿង, កុំព្យូទ័រយួរដៃ ២គ្រឿង, CPU ១គ្រឿង, ម៉ូនីទ័រ ១គ្រឿង, ស៊ីមកាតខ្មែរ ៤៥សន្លឹក និងដុំ Wi-Fi ១គ្រឿង។ បច្ចុប្បន្ន ទីតាំងនេះត្រូវបានបិទ ហើយជនសង្ស័យទាំង ២នាក់ ត្រូវបានបញ្ជូនទៅអធិការដ្ឋាននគរបាលក្រុងប៉ោយប៉ែតដើម្បីសាកសួរ។
​ទីតាំងទី៣ (អគារកម្ពស់ ៧ជាន់): ស្ថិតនៅភូមិសាមគ្គីមានជ័យ សង្កាត់ផ្សារកណ្តាល។ ក្រុមការងារបានរកឃើញមនុស្សសរុប ១៤៣នាក់ ក្នុងនោះមានជនបរទេស ១៣៣នាក់ (ស្រី ៥១នាក់) មាន ៣សញ្ជាតិ គឺ៖ វៀតណាម ៨២នាក់ (ស្រី ២៦នាក់), ថៃ ៣៣នាក់ (ស្រី ១៦នាក់), ចិន ១៨នាក់ (ស្រី ២នាក់) និងជនជាតិខ្មែរ ១៤នាក់ (ស្រី ៧នាក់)។
​សម្ភារដែលត្រូវបានរឹបអូសនៅទីតាំងទី៣ រួមមាន៖ កុំព្យូទ័រ All-in-One ៣១៣គ្រឿង, ទូរស័ព្ទដៃ ២០២គ្រឿង, ម៉ូនីទ័រ ៩៦គ្រឿង, CPU ៣០គ្រឿង, កុំព្យូទ័រយួរដៃ ១គ្រឿង និងកាតការងារ ៨សន្លឹក។
​ក្រោយប្រតិបត្តិការ ជនសង្ស័យសរុប ១៤៥នាក់ ត្រូវបានបញ្ជូនទៅមណ្ឌលកងក្រុងសិរីសោភ័ណ ដើម្បីបន្តនីតិវិធី រីឯវត្ថុតាងទាំងអស់ត្រូវកម្លាំងសមត្ថកិច្ចដកហូតយករក្សាទុកនៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការតាមផ្លូវច្បាប់៕