អាវុធហត្ថខេត្តកំពង់ឆ្នាំង បង្ក្រាបករណីរក្សាទុក និងជួញដូរគ្រឿងញៀន កសាងសំណុំរឿងបញ្ជូនទៅអយ្យការ

​
​ខេត្តកំពង់ឆ្នាំង៖ អនុវត្តតាមបទបញ្ជាយ៉ាងម៉ឺងម៉ាត់ពីលោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តកំពង់ឆ្នាំង និងមានការសម្របសម្រួលនីតិវិធីពី ឯកឧត្តម ឯក ស៊ុនរស្មី ព្រះរាជអាជ្ញា អមសាលាដំបូងខេត្តកំពង់ឆ្នាំង កម្លាំងជំនាញបានកសាងសំណុំរឿងបញ្ជូនខ្លួនជនសង្ស័យម្នាក់ ពាក់ព័ន្ធករណីគ្រឿងញៀនទៅតុលាការ។
​ប្រតិបត្តិការនេះបានធ្វើឡើងនៅវេលាម៉ោង ១៤:១៣នាទី ថ្ងៃទី១៣ ខែសីហា ឆ្នាំ២០២៦ ដោយកម្លាំងការិយាល័យប្រឆាំងគ្រឿងញៀន នៃកងរាជអាវុធហត្ថខេត្តកំពង់ឆ្នាំង បានបញ្ជូនជនសង្ស័យឈ្មោះ យ៉ុង មករា ភេទប្រុស អាយុ១៨ឆ្នាំ មុខរបរកម្មករសំណង់ មានទីលំនៅភូមិបឹងលាជ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង ទៅកាន់អយ្យកាអមសាលាដំបូងខេត្តកំពង់ឆ្នាំង ដើម្បីចាត់ការតាមច្បាប់ ពាក់ព័ន្ធករណីរក្សាទុក ចែកចាយ និងប្រើប្រាស់ដោយខុសច្បាប់នូវសារធាតុញៀន។
​ក្នុងប្រតិបត្តិការនេះ កម្លាំងសមត្ថកិច្ចដកហូតបានវត្ថុតាងរួមមាន៖
​ម្ស៉ៅក្រាមពណ៌សថ្លា (សង្ស័យជាម៉ាទឹកកក) ចំនួន ០៥កញ្ចប់ (តូច ០៤កញ្ចប់ និងធំ ០១កញ្ចប់) ទម្ងន់សរុប ៧,៥៥ក្រាម (គិតទាំងសំបកវេចខ្ចប់)
​ម៉ូតូ ម៉ាកហុងដាសង់ C125 ពណ៌ខ្មៅ ពាក់ផ្លាកលេខ ភ្នំពេញ 1KB-8932 ចំនួន ០១គ្រឿង
​ទូរស័ព្ទដៃ ម៉ាក iPhone ចំនួន ០១គ្រឿង
​ថង់សម្រាប់វេចខ្ចប់គ្រឿងញៀនមួយចំនួន
​បច្ចុប្បន្ន ជនសង្ស័យរួមជាមួយវត្ថុតាងខាងលើ ត្រូវបានការិយាល័យជំនាញកងរាជអាវុធហត្ថខេត្តកំពង់ឆ្នាំង បញ្ជូនទៅដល់ស្ថាប័នអយ្យការអមសាលាដំបូងខេត្តកំពង់ឆ្នាំង រួចរាល់ហើយ ដើម្បីបន្តនីតិវិធីផ្លូវច្បាប់៕