​ប្រជាពលរដ្ឋ ៣២០នាក់ នៅស្រុកសណ្តាន់ ទទួលបានការជួយជ្រោមជ្រែងឱ្យទៅពិនិត្យ និងព្យាបាលជំងឺភ្នែក ដោយឥតគិតថ្លៃនៅរាជធានីភ្នំពេញ ​

​
​ខេត្តកំពង់ធំ៖ នាព្រឹកថ្ងៃទី១៣ ខែសីហា ឆ្នាំ២០២៦ អាជ្ញាធរស្រុកសណ្ដាន់បានរៀបចំពិធីជូនដំណើរប្រជាពលរដ្ឋ និងលោកយាយលោកតា វគ្គទី១ ចំនួន ១០៩នាក់ ក្នុងចំណោមប្រជាពលរដ្ឋសរុប ៣២០នាក់ ដើម្បីเดินทางទៅពិនិត្យ និងព្យាបាលជំងឺភ្នែកនៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។
​ដំណើរការទៅពិនិត្យ និងព្យាបាលជំងឺភ្នែកនេះ ទទួលបានការជួយសម្របសម្រួល និងឧបត្ថម្ភគាំទ្រយ៉ាងយកចិត្តទុកដាក់លើការស្នាក់នៅ ការហូបចុក ប្រេងឥន្ធនៈ និងមធ្យោបាយដឹកជញ្ជូន ពីសំណាក់ លោកជំទាវបណ្ឌិត ជា សេរី និង ឯកឧត្តមនាយឧត្តមសេនីយ៍ ម៉ៅ សុផាន់ អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ។ ពិធីសំណេះសំណាល និងជូនដំណើរកាត់ឆ្វៀលនេះ បានប្រព្រឹត្តទៅក្រោមអធិបតីភាព ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកសណ្ដាន់។
​លោកស្រី ឡាក់ សៅចាន់ អភិបាលរងស្រុកសណ្ដាន់ បានបញ្ជាក់ថា ប្រជាពលរដ្ឋទាំង ៣២០នាក់ ត្រូវបែងចែកជា ៣វគ្គ រួមមាន៖
​វគ្គទី១៖ ចេញដំណើរនៅថ្ងៃទី១៣ ខែសីហា ចំនួន ១០៩នាក់ (រថយន្តក្រុង ៨គ្រឿង)
​វគ្គទី២៖ ចេញដំណើរនៅថ្ងៃទី១៤ ខែសីហា ចំនួន ១១០នាក់ (រថយន្តក្រុង ៨គ្រឿង)
​វគ្គទី៣៖ ចេញដំណើរនៅថ្ងៃទី១៥ ខែសីហា ចំនួន ១០១នាក់ (រថយន្តក្រុង ៨គ្រឿង)
​តំណាងប្រជាពលរដ្ឋទាំងអស់ បានសម្តែងនូវក្តីរំភើប និងគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវ ព្រមទាំងក្រុមការងាររាជរដ្ឋាភិបាលចុះមូលដ្ឋាន ដែលតែងតែយកចិត្តទុកដាក់ខ្ពស់ចំពោះសុខមាលភាព និងជីវភាពរស់នៅរបស់ប្រជាពលរដ្ឋនៅមូលដ្ឋានដាច់ស្រយាល។
​ជាមួយគ្នានេះ ឧត្តមសេនីយ៍ទោ សោម ស៊ុន ក៏បានជូនពរដល់ប្រជាពលរដ្ឋ និងលោកយាយលោកតាទាំងអស់ ឱ្យទទួលបានជោគជ័យក្នុងការព្យាបាល និងមានសុវត្ថិភាពតាមដងផ្លូវក្នុងការធ្វើដំណើរទាំងទៅនិងមក៕