ខេត្តកំពង់ធំរងការវាយប្រហារដោយខ្យល់កន្ត្រាក់ និងរន្ទះបាញ់ បណ្តាលឱ្យមនុស្សម្នាក់ស្លាប់ និងផ្ទះជាង ៥០ខ្នងរងការខូចខាត

​(កំពង់ធំ)៖ គ្រោះធម្មជាតិដែលបង្កឡើងដោយភ្លៀងធ្លាក់លាយឡំជាមួយខ្យល់កន្ត្រាក់ និងផ្គររន្ទះ បានវាយប្រហារស្រុកចំនួន ៤ ក្នុងខេត្តកំពង់ធំ កាលពីរសៀលថ្ងៃទី២៨ ខែមេសា ឆ្នាំ២០២៦ បណ្តាលឱ្យបុរសម្នាក់បាត់បង់ជីវិត និងខូចខាតផ្ទះសម្បែង សាលាឆាន់ និងកុដិលោកជាច្រើនខ្នង។
​តាមរបាយការណ៍បឋមពីអាជ្ញាធរមូលដ្ឋាន ស្ថានភាពខូចខាតតាមស្រុកនីមួយៗមានដូចខាងក្រោម៖
​១. ស្រុកសន្ទុក៖ មនុស្សម្នាក់ស្លាប់ដោយរន្ទះបាញ់
​នៅវេលាម៉ោង ៤:៣០នាទីរសៀល ក្នុងភូមិចំបក់ ឃុំតាំងក្រសាំង មានករណីរន្ទះបាញ់បណ្តាលឱ្យលោក ហ៊ុយ គ្រឿន ភេទប្រុស អាយុ ៥៧ឆ្នាំ (ជាប្រជាការពារភូមិ) ស្លាប់បាត់បង់ជីវិតភ្លាមៗនៅនឹងកន្លែង ខណៈពេលដែលគាត់កំពុងសាបព្រោះស្រូវនៅវាលស្រែចុងភូមិ។ ដោយឡែក នៅវត្តបុស្សស្រល់ ភូមិអូរធំ ខ្យល់កន្ត្រាក់បានបោកបក់បណ្តាលឱ្យរបើកដំបូលសាលាឆាន់ (ទំហំ ១៦ម x ២៧ម) និងកុដិលោកផងដែរ។
​២. ស្រុកប្រាសាទបាល័ង្គ៖ ផ្ទះ ៣ខ្នងរលំទាំងស្រុង
​នៅវេលាម៉ោង ៣:៥០នាទីរសៀល ស្ថិតក្នុងភូមិថ្នល់ ឃុំទួលគ្រឿល ខ្យល់កន្ត្រាក់បានធ្វើឱ្យ៖
​រលំផ្ទះទាំងស្រុង៖ ០៣ ខ្នង
​របើកដំបូល៖ ១៨ ខ្នង
​សសរលោតចេញពីជើងទម្រ៖ ០១ ខ្នង
(ក្នុងករណីនេះ មិនមានប្រជាពលរដ្ឋរងរបួសឡើយ)។
​៣. ស្រុកកំពង់ស្វាយ៖ ប៉ះពាល់ផ្ទះប្រជាពលរដ្ឋ ១១ខ្នង
​នៅវេលាម៉ោង ២:៣០នាទីរសៀល ខ្យល់កន្ត្រាក់បានវាយប្រហារឃុំចំនួន ២ រួមមាន៖
​ឃុំនីពេជ៖ ខូចខាតផ្ទះចំនួន ១០ខ្នង (ភាគច្រើនរបើកក្បឿងចន្លោះពី ១៥០ ទៅ ៣៥០សន្លឹក) និងរលំជង្រុកស្រូវ ១ខ្នង។ ម្ចាស់ផ្ទះដែលរងគ្រោះមានដូចជា លោក ម៉ៅ ឡំ, លោក ជ វីរៈសិទ្ធិ, លោក លាន លឿន, លោក ហៀង ហិច, អ្នកស្រី ពាង ងឿន, លោក ឆោម កុសល, លោក ឃាម ខៃ, អ្នកស្រី ហួន សិត, អ្នកស្រី ហែល ផល់ និងលោក លាន ឡុញ។
​ឃុំដំរីស្លាប់៖ របើកដំបូលផ្ទះ និងរានបាយចំនួន ១ខ្នង ជារបស់អ្នកស្រី ធួត ម៉ោច នៅភូមិមង្គលស្លា។
​៤. ស្រុកស្ទោង៖ ផ្ទះជិត ២០ខ្នងរងផលប៉ះពាល់
​នៅល្ងាចថ្ងៃដដែលនោះ ខ្យល់កន្ត្រាក់បានបោកបក់នៅក្នុងឃុំចំនួន ២ គឺ៖
​ឃុំចំណាក្រោម៖ របើកដំបូល ១៦ខ្នង និងរលំផ្ទះទាំងស្រុង ១ខ្នង។
​ឃុំប្រឡាយ៖ របើកដំបូលផ្ទះចំនួន ២ខ្នង។
​បច្ចុប្បន្ន អាជ្ញាធរមូលដ្ឋាន និងសាខាកាកបាទក្រហមកម្ពុជាខេត្តកំពង់ធំ កំពុងចុះពិនិត្យស្ថានភាពជាក់ស្តែង ដើម្បីរៀបចំអន្តរាគមន៍ និងផ្តល់អំណោយសង្គ្រោះបន្ទាន់ជូនដល់គ្រួសាររងគ្រោះទាំងអស់។