(កំពង់ធំ)៖ លោក ទុយ សុធារិទ្ធ អនុប្រធានក្រុមការងារចុះជួយមូលដ្ឋានស្រុកប្រាសាទបល្ល័ង្ក និងជាអនុប្រធានក្រុមការងារចុះជួយមូលដ្ឋានឃុំទួលគ្រឹល បានសង្កត់ធ្ងន់ថា សមាជិក សមាជិកាគណបក្សទាំងអស់ ត្រូវតែមានឆន្ទៈមោះមុត និងគោរពឱ្យបានម៉ឺងម៉ាត់នូវរាល់គោលការណ៍ និងលក្ខន្តិកៈរបស់គណបក្ស។
ការថ្លែងបែបនេះរបស់ លោក ទុយ សុធារិទ្ធ ធ្វើឡើងក្នុងពិធីប្រកាសសមាសភាពក្រុមការងារចុះជួយមូលដ្ឋានភូមិជន្លូស ឃុំទួលគ្រឹល ស្រុកប្រាសាទបល្ល័ង្ក ខេត្តកំពង់ធំ នាថ្ងៃទី២០ ខែមិថុនា ឆ្នាំ២០log ដោយមានការអញ្ជើញចូលរួមពីសំណាក់មន្ត្រីបក្ស និងសមាជិក សមាជិកាជាង ១០០នាក់។
គណបក្សប្រជាជនកម្ពុជា មិនដែលបោះបង់ប្រជាពលរដ្ឋ
លោកអនុប្រធានក្រុមការងារ បានបន្តលើកឡើងថា ថ្នាក់ដឹកនាំគណបក្សប្រជាជនកម្ពុជា ជាពិសេស សម្តេចតេជោ ហ៊ុន សែន ប្រធានគណបក្សប្រជាជនកម្ពុជា តែងតែរួមសុខរួមទុក្ខជាមួយប្រជាពលរដ្ឋគ្រប់ពេលវេលា និងគ្រប់កាលៈទេសៈទាំងអស់។
”នៅពេលណាដែលប្រជាជនជួបការលំបាក គណបក្សប្រជាជនកម្ពុជាមិនដែលបោះបង់ ឬរត់ចោលប្រជាពលរដ្ឋម្តងណាឡើយ”។ លោក ទុយ សុធារិទ្ធ បញ្ជាក់បន្ថែម។
ទន្ទឹមនឹងនេះ លោកបានរំលឹកដល់ក្រុមការងារគ្រប់ជាន់ថ្នាក់ ត្រូវបន្តចុះមូលដ្ឋានឱ្យបានជាប់ជាប្រចាំ ដើម្បីស្វែងយល់ពីសុខទុក្ខ និងជួយដោះស្រាយបញ្ហាលំបាកនានារបស់សមាជិកបក្ស ក៏ដូចជាប្រជាពលរដ្ឋ ក្នុងគោលបំណងថែរក្សាចំណងសាមគ្គីភាពឱ្យកាន់តែរឹងមាំ ក្នុងនាមជាមហាគ្រួសារតែមួយរបស់គណបក្សប្រជាជនកម្ពុជា។
ទិសដៅការងារ និងការត្រៀមលក្ខណៈសម្រាប់ការបោះឆ្នោត
នៅក្នុងឱកាសនោះដែរ លោក ទុយ សុធារិទ្ធ បានដាក់ចេញនូវការណែនាំសំខាន់ៗដល់ក្រុមការងារ និងមន្ត្រីគណបក្សគ្រប់លំដាប់ថ្នាក់ ដូចខាងក្រោម៖
ពង្រឹងផ្ទៃក្នុងបក្ស៖ រួមកម្លាំងគ្នាកសាង និងពង្រឹងគណបក្ស តាមរយៈការពង្រឹងការដឹកនាំគ្រប់ថ្នាក់ ធ្វើខ្លួនជាគំរូល្អ និងរៀបចំប្រព័ន្ធការងារឱ្យមានរបៀបរៀបរយ។
ពង្រីកសមាជិកថ្មី៖ ជម្រុញការកសាងសមាជិកបក្សបន្ថែមទាំងបរិមាណ និងគុណភាព ដោយផ្តោតការយកចិត្តទុកដាក់ខ្លាំងលើស្រទាប់យុវជន។
ការពារសន្តិភាព៖ ទប់ស្កាត់រាល់ឧបាយកលទុច្ចរិតទាំងឡាយ ដើម្បីរក្សាសន្តិភាព និងភាពសុខសាន្តជូនប្រជាពលរដ្ឋ។
ឆ្លើយតបព័ត៌មានទាន់ពេល៖ ពង្រឹងការងារសាធារណមតិ និងក្រុមប្រតិកម្មរហ័ស ដើម្បីឆ្លើយតប និងវាយបកឱ្យបានទាន់ពេលវេលាចំពោះការញុះញង់ ឬការមួលបង្កាច់នានា។
ជាចុងក្រោយ លោកបានជំរុញឱ្យក្រុមការងារទាំងអស់ ត្រូវចុះពិនិត្យ និងក្តាប់ឱ្យបានច្បាស់លាស់អំពីស្ថានភាពសមាជិកម្នាក់ៗ ជាពិសេសបញ្ហាអត្តសញ្ញាណប័ណ្ណសញ្ជាតិខ្មែរ (ពិនិត្យមើលថាតើមានគ្រប់គ្នាហើយឬនៅ ឬហួសសុពលភាព) និងត្រូវជម្រុញការត្រួតពិនិត្យបញ្ជីឈ្មោះ ព្រមទាំងការចុះឈ្មោះបោះឆ្នោតនាពេលខាងមុខ ឱ្យបានត្រឹមត្រូវ និងគ្រប់ៗគ្នា៕
