ដោយ : ភ្នំធំ / បន្ទាយមានជ័យ :លោក អ៊ុំ រាត្រី អភិបាលខេត្តបន្ទាយមានជ័យ បានអំពាវនាវដល់ថ្នាក់ដឹកនាំ មន្ត្រីរាជការ អាជីវករ ពាណិជ្ជករ សប្បុរសជន ចូលរួមជាមួយរដ្ឋបាលខេត្តក្នុងយុទ្ធនាការ «១ម៉ឺនរៀល ១ម៉ឺននាក់» ដើម្បីរៃអង្គាសថវិកាជួយដល់ កុមារកម្ពុជា ដែលកំពុងសម្រាកព្យាបាលនៅមន្ទីរពេទ្យគន្ធបុប្ផា។
ការអំពាវនាវនេះធ្វេីឡេីងនៅឱកាសដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ដោយមានការអញ្ជើញចូលរួមពី ស្ថាប័នអយ្យការអមសាលាដំបូង មេបញ្ជាការកងកម្លាំងគ្រប់ជាន់ថ្នាក់ គណៈអភិបាលរងខេត្ត មន្ទីរ អង្គភាពពាក់ព័ន្ធជុំវិញខេត្ត អភិបាលក្រុង-ស្រុក ។
ព្រឹត្តិការណ៍ជាសាធារណ:នោះ នឹងមានកម្មពិធីជិះកង់រៃអង្គាសថវិកានេះគ្រោងធ្វើនៅថ្ងៃទី៧ មិថុនា ២០២៦ខាងមុខនេះ នៅបរិវេណសាលាខេត្តនិងដងផ្លូវក្នុងក្រុងសិរីសោភ័ណ។
លោកតាប់ ខែម ប្រធានក្រុមអ្នកជិះកង់ខេត្តបន្ទាយមានជ័យឲ្យដឹងថា:ក្រុមលោកនឹងចូលរួមជាមួយរដ្ឋបាលខេត្តដើម្បីសហការរៀបចំព្រឹត្តិការណ៍ជិះកង់រៃអង្គាសថវិកាទ្រទ្រង់មូលនិធីមន្ទីរពេទ្យគន្ធរបុប្ផា តាមរយ:យុទ្ធនាការ «១ម៉ឺនរៀល ១ម៉ឺននាក់» តាមគំនិតផ្តួចផ្តើម ដឹកនាំរបស់លោកជំទាវបណ្ឌិតពេជ ច័ន្ទមូនី នេះ ។
កន្លងមកក្រុមលោក ក៏ធ្វើសម្មភាពរៃអង្គាសប្រាក់និងការងារមនុស្សធម៌នានាដើម្បីរកមូលនិធីទ្រទ្រង់មន្ទីរពេទ្យកុមារអង្គរ , មន្ទីរពេទ្យគន្ធរបុប្ផា និងកម្មវិធីកីឡា មិត្តភាពជាដើម៕
